Kryetarja e Alternativës, Mimoza Kusari-Lila, ka treguar detaje nga procesi i negociatave mes Lëvizjes Vetëvendosje dhe Fatmir Limajt për krijimin e shumicës parlamentare. Deputetja tha se ka pasur disa takime mes deputetit Albin Kurti dhe kreut të NISMA-s, Fatmir Limajt, përfshirë edhe takime me ekipet e tyre përkatëse.
Sipas Kusari-Lilës, bisedimet kanë qenë transparente, por diskutimet specifike kanë mbetur brenda palëve. Ajo shtoi se Limaj ka qenë i palëkundur në kërkesën që të marrë pozitën e Kryetarit të Kuvendit – një kërkesë që, sipas saj, nuk ka pasur mbështetje të mjaftueshme në Kuvend.
“Shumë ka qenë transparente gjithçka. Normalisht që takimet brenda, çka është diskutuar, kanë mbetur brenda palëve, por edhe ato janë thënë pas takimit. Do të thotë, me z. Limaj diku 6-7 herë është takuar z. Kurti në instanca të ndryshme ose me përfaqësues të tij. Mandej ka pasur edhe diskutime për zgjidhje alternative në një farë forme, por kërkesa e tij ka qenë kokëfortë në raport me pozitën e kryetarit të Kuvendit, e cila pozitë nuk mund të merrte shumicën, jo vetëm të grupit tonë parlamentar, por nuk kishte vota as nga grupet tjera. AAK u deklarua se nuk e voton Limajn, PDK po ashtu, ndërsa LDK tha se nuk e voton askënd që e propozon Vetëvendosja. Në grupin tonë parlamentar nuk kishte homogjenitet votash për z. Limaj”, u shpreh Kusari-Lila në “DPT me Fidanin” në Klan Kosova.
