Biznesmeni nga Skenderaj, Naser Deliu, bashkëpronar i kompanisë ndërtimore “Valoni Titan”, është vendosur në arrest shtëpiak për një muaj pasi që punëtori i kompanisë së tij u rrëzua nga kati i gjashtë i një objekti ndërtimor, duke pësuar lëndime të rënda trupore.
Lajmin e ka konfirmuar për Gazetën Insajderi, Gjykata Themelore e Gjilanit. Në përgjigje, thuhet se gjyqtari i procedurës ka refuzuar kërkesën e Prokurorisë për caktimin e masës së paraburgimit, duke i caktuar vetëm masën e arrestit shtëpiak.
“Në lidhje me pyetjen e juaj për të pandehurin Naser Deliu, i cili dyshohet se ka kryer veprën penale asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës nga neni 358 paragrafi 5 lidhur me paragrafin 3 dhe të 2 të Kodit Penal të Republikës së Kosovës (KPRK), gjyqtari i procedurës paraprake ka refuzuar kërkesën e Prokurorisë Themelore të Gjilanit për caktimin e masës së paraburgimit dhe ka nxjerrë aktvendim duke i caktuar masën e arrestit shtëpiak në kohëzgjatje prej një muaji”, ka thënë për Insajderin, zëdhënësi për media i gjykatës, Sabit Shkodra.
Deliu fillimisht është ndaluar për 48 orë me urdhër të prokurorit të rastit, nën dyshimet për veprat penale “Asgjësimi, dëmtimi ose heqja e pajisjeve mbrojtëse” dhe “Rrezikim i sigurisë në vendin e punës”.
Pas ndalimit fillestar, ndaj tij është vendosur masa e arrestit shtëpiak.
Biznesmeni, Naser Deliu kishte konfirmuar edhe vetë për Insajderin caktimin e masës së arrestit shtëpiak.
“Arrestimi është bërë ashtu siç e ka paraparë gjyqtari dhe prokurori. Tre persona janë arrestuar, dy janë liru dhe i treti është në paraburgim një muaj. Unë jam Naseri vet. Jam në arrest shtëpiak”, tha ai në një prononcim për Insajderin.
Përveç Deliut, policia ka arrestuar edhe dy persona të tjerë, por ata janë liruar në procedurë të rregullt.
Si ndodhi aksidenti ku mbeti i lënduar rëndë 23 vjeçari, Rinor Haxhiu
Punëtori Rinor Haxhiu, 23-vjeçar nga fshati Kabash i Vitisë, ka pësuar lëndime të rënda pasi ra nga kati i gjashtë i një objekti ndërtimor në Gjilan, ku ishte duke punuar.
Zëdhënësi i Policisë për rajonin e Gjilanit, Ismet Hashani, ka konfirmuar për mediat se rasti ka ndodhur të premten, më 24 tetor 2025, në orët e pasdites.
“Sipas informacioneve fillestare, punëtori kishte qenë duke punuar në një objekt ndërtimor në Gjilan, kur dyshohet se ka rënë aksidentalisht nga kati i gjashtë. Si pasojë e rënies, ai ka pësuar lëndime të rënda trupore”, – tha Hashani.
I lënduari është dërguar fillimisht në Shtëpinë e Shëndetit në Gjilan, ndërsa për shkak të gjendjes së rëndë është transferuar menjëherë në Qendrën Klinike Universitare të Kosovës (QKUK) në Prishtinë për trajtim të mëtejmë.
Kush është biznesmeni Naser Deliu
Sipas Regjistrimit të Bizneseve, Naser Deliu është pronar i dy kompanive. Ai është pronari i vetëm i kompanisë së ndërtimit “Valoni Company” dhe bashkëpronar i kompanisë “Valoni Titan”, ku ndodhi aksidenti.
Deliu ishte përfolur edhe më herët në media lidhur me një rast të një familjari të tij. Djali i axhës së tij ishte lënë i lirë pas kishte goditur për vdekje një qytetar në Skenderaj./Veriu.info
