Familjarë dhe bashkëpunëtorë të kryetarit të Komunës së Suharekës, Bali Muharremaj, po dalin të jenë pronar të disa pronave në Delloc të Suharekës, shpronësimi i të cilave pritet të realizohet së shpejti për tu ndërtuar një rrugë.
Tokat në fjalë ndodhen në zonën ku parashihet ndërtimi i rrugës rajonale që lidh Mushtishtin me Shterpcën. Dyshohet se , pasi disa zyrtarë kanë pasur njohuri për planet e ndërtimit të rrugës.
Pronar të disa pronave – ku veçse ka nisur hapja e rrugës, përkundër se nuk janë kryer ende shpronësimet – dalin të jenë: Visar Kuqi, Drejtori i Infrastrukturës; Edon Muharremaj, djali i vëllait të kryetarit Bali Muharremaj; Driton Maliqaj, ish-asamblist i AAK-së dhe ish-drejtor komunal në Suharekë; dhe Fatos Kuqi, Shef i Prokurimit në Komunën e Suharekës.
Kryetari Bali Muharremaj ka folur për Gazetën Online Reporteri për këtë çështje. Ai e pranon se nipi i tij ka blerë pronë aty, por thotë se është e drejtë e secilit qytetarë që të blejë prona.
“Rruga ende nuk është hapur, por punimet janë në fazën përfundimtare. Shtrimi i asfaltit është planifikuar dhe një kompani e autorizuar ka marrë kryerjen e punimeve. Projekti është nën mbikëqyrjen e Ministrisë së Infrastrukturës dhe pritet të përfundojë vitin e ardhshëm deri te guri i Dollovcit. Elaborati është dorëzuar në Qeverinë e Kosovës për shpronësim dhe komisioni përkatës ka kryer vlerësimin e pronave dhe ka paguar pagesat përkatëse. Rruga ka nisur më 2017 dhe unë nuk kam qenë kryetar atëherë, ndaj nuk mund të jap informacion mbi blerjet e mëparshme. E drejta e çdo qytetari për të blerë pronë është e papenguar. Sa i përket blerjeve të familjarëve, djali i vëllait ka blerë tokë, por çdo verifikim tjetër mund të bëhet në dokumentacionin zyrtar”
Reporteri.net ka kontaktuar edhe me Drejtorin e Urbanizimit, Visar Kuqi, i cili deklaroi se projekti i rrugës është një iniciativë që daton nga vitet ’80. Ai theksoi se tokat që ka blerë janë prona familjare dhe janë blerë para marrjes së pozicionit aktual. Kuqi ka blerë prona në vitet 2017, 2018 dhe 2020, duke shtuar:
“Të gjitha pronat që kam blerë janë pronë familjare. Nuk janë blerë me çmim të lirë dhe asgjë nga këto nuk është e jashtëligjshme. Nuk kam pasur njohuri paraprake se rruga do të kalonte aty”
Edhe pronarët e tjerë të tokave, të cilët e mohojnë se kanë pasur dijeni mbi planet e rrugës. Madje, nipi i kryetarit Muharremaj, Edon Muharremaj, tha se çmimi nuk është faktor vendimtar dhe se do të ishte i gatshëm të falte pronën në favor të shtetit.
“Nëse i vjen nevoja shtetit për atë tokë, nga ky moment e fal” tha ai.
Kryetari Muharremaj theksoi se blerjet e pronave janë kryer para se rruga të ishte planifikuar, ndërsa shefi i Prokurimit, Fatos Kuqi, deklaroi se parcelat që ka blerë në vitin 2018 i janë propozuar nga shoqëria dhe se nuk ka pasur njohuri paraprake mbi projektin e rrugës.
Edhe ish-kandidati i AAK-së për deputet, Driton Maliqaj konfirmoi se tokën e ka blerë më 2018, duke theksuar se nuk ka pasur njohuri për kalimin e rrugës në atë zonë dhe nuk ka dhënë informacion mbi vlerën e propozuar për shpronësim nga Ministria.
Në listën e shpronësimeve ka edhe prona në emër të familjes së Emrush Bytyqit, ish-drejtor i Shërbimeve Pronësore Juridike dhe Kadastër në Suharekë. I njëjti, të premten, ka qenë pa qasshëm në thirrjet e mediumit rreth kësaj çështje.
Qeveria e Kosovës, më datë 9 tetor 2024, ka marrë vendim për shqyrtimin e kërkesës për shpronësim për interes publik të pronave të paluajtshme të cilat preken nga realizimi i projektit Ndërtimi i Rrugës Rajonale R-118 Mushtisht–Shterpcë, në zonat kadastrale Delloc (Komuna e Suharekës) dhe Vërbovë (Komuna e Shtërpcës).
Sipas këtij vendimi, vlerësimi i pronave të paluajtshme do të kryhet nga Departamenti për Vlerësimin e Pronave të Paluajtshme, Ministria e Financave, Punës dhe Transfereve.
Kjo është lista e plotë me pronat që do të shpronësohen:
https://drive.google.com/file/d/1qYJFrnIXfbB_8GTmq4fPcA8IAFAP55cS/view
