Deputetja e LDK-së, Hykmete Bajrami ka reaguar pas një deklarate të Ministrit në detyrë të financave, Hekuran Muratit i cili tha se në vitin 2021 përkundër se Qeveria Hoti ishte në detyrë, ata për interes të shtetit e kishin votuar.
Sipas saj situata nuk është e njëjtë sikur kur Hoti ishte Kryeministër në detyrë, pasi siç thotë ajo ai s’ka qenë deputet i betuar i Kuvendit të Kosovës, siç tani është Kurti dhe të tjerët, ndërsa i quan mashtrues VV-në.
“Mashtrues, Situata nuk është e njëjtë sepse z. Hoti në atë kohë ka qenë Kryeministër në detyrë, jo deputet i betuar në Kuvendin e Kosovës, unë kam qenë ministre e financave në detyrë jo deputete e betuar e Kuvendit. Interesi i shtetit është që ju sa më parë të shkoni në shtëpi e jo të ju zgjasim jetën duke e votuar buxhetin në kundërshtim me Kushtetutën”, shkruan Bajrami në Facebook.
Ajo thotë se s’ka ndonjë tregues që VV-ja do të ndryshojë ndonjëherë së qeni mashtruese.
“Mashtrues keni qenë, të tillë jeni dhe s’ka asnjë tregues që do të ndryshoni ndonjëherë.
Zgjedhje sepse s’ka zgjidhje – kthehemi te qytetarët, atyre u tregoni se pse me 42% që nëntë muaj nuk ishit në gjendje të bënit koalicion qeverisës”, thotë Bajrami.
Në postimin etij, Murati shkroi se në 21 dhjetor 2020, Gjykata Kushtetuese kishte konstatuar që Qeveria Hoti ishte e paligjshme dhe se vendi duhej të shkonte në zgjedhje të parakohhshme.
Siç shkruan ai atë kohë ishte “një situatë e jashtëzakonshme sepse buxheti për vitin 2021 nuk ishte i miratuar, kurse “qeveria” tani ishte në detyrë, dhe koalicioni qeverisës nuk i kishte as votat e nevojshme për të tentuar kalimin e buxhetit”.
“Mirëpo për hir të interesit shtetëror, ne vendosëm që të linim anash ndasitë politike dhe e votuam buxhetin e vitit 2021, para se të shkohej në zgjedhje”, shkroi Murati në Facebook./Reporteri
