Buxheti i vitit 2026 ka përplasur në distancë, ministrin në detyrë të Financave, Hekuran Murati dhe shefen e grupit parlamentar të LDK-së, Hykmete Bajrami.
E gjitha nisi pas një statusi që shkroi Murati, i cili tha se në vitin 2021 përkundër se Qeveria Hoti ishte në detyrë, VV për interes të shtetit e kishin votuar buxhetin, shkruan Reporteri.net.
Murati kësisoj ka bërë thirrje që buxheti buxheti për vitin 2026 duhet të votohet para se të shkohet në zgjedhje.
“Buxheti i vitit 2026 duhet të votohet para se të shkohet në zgjedhje. Më 21 dhjetor 2020, Gjykata Kushtetuese kishte konstatuar që Qeveria Hoti ishte e paligjshme dhe se vendi duhej të shkonte në zgjedhje të parakohhshme.
Kjo ishte një situatë e jashtëzakonshme sepse buxheti për vitin 2021 nuk ishte i miratuar, kurse “qeveria” tani ishte në detyrë, dhe koalicioni qeverisës nuk i kishte as votat e nevojshme për të tentuar kalimin e buxhetit.
Zyra e BE-së në Kosovë, ambasadat,odat ekonomike, shoqëria civile, analistët, edhe Avdullah Hoti si kryeminsitër e Hykmete Bajrami si ministre e financave – të gjithë njëzëri atëherë patën bërë thirrje që buxheti të miratohej para se të shkohej në zgjedhje, edhe pse bëhej fjalë për një buxhet të një qeverie tashmë të shpallur si e paligjshme nga Kushtetuesja”.
“Argumenti ishte se, pavarësisht statusit të qeverisë si e paligjshme e në detyrë, vendi nuk bënte të rrezikohej nga një situatë ku nuk kishte buxhet, e kësisoj të rrezikoheshin pagat, pensionet, dhe pagesat tjera që do të destabilizonin ekonominë. Lëvizja Vetëvendosje asokohe e kishte çdo arsye të botës për të mbajtur mllef, sepse na ishte vjedhur mandati qeverisës duke na e rrëzuar qeverinë në mes të pandemisë.
Mirëpo për hir të interesit shtetëror, ne vendosëm që të linim anash ndasitë politike dhe e votuam buxhetin e vitit 2021, para se të shkohej në zgjedhje”.
“Kësisoj, në afat rekord brenda dy ditësh, i patëm kryer dy leximet e ligjit dhe vendit i dhamë buxhet e stabilitet.
A e ka guximin opozita e sotme ta bëjë të njëjtën gjë, dhe ta tejkalojë inatin politik për shkak të interesit të shtetit?
Po Zyra e BE-së, ambasadat, odat ekonomike, shoqëria civile, a mendonjë njësoj edhe tash – që vendi nuk bën të shkojë në zgjedhje pa buxhet?”, ka shkruar Murati.
Por, nuk ka vonuar reagimi nga shefja e grupit parlamentar të LDK-së, Hykmete Bajrami, e cila ka thënë se situata nuk është e njëjtë. Bajrami thotë se kur Hoti ishte Kryeministër në detyrë, nuk ka qenë edhe deputet i betuar i Kuvendit të Kosovës, siç tani është Kurti dhe të tjerët, ndërsa ajo i quan mashtrues Vetëvendosjen, shkruan Reporteri.net.
“Mashtrues, Situata nuk është e njëjtë sepse z. Hoti në atë kohë ka qenë Kryeministër në detyrë, jo deputet i betuar në Kuvendin e Kosovës, unë kam qenë ministre e financave në detyrë jo deputete e betuar e Kuvendit.
Interesi i shtetit është që ju sa më parë të shkoni në shtëpi e jo të ju zgjasim jetën duke e votuar buxhetin në kundërshtim me Kushtetutën”.
“Mashtrues keni qenë, të tillë jeni dhe s’ka asnjë tregues që do të ndryshoni ndonjëherë.
Zgjedhje sepse s’ka zgjidhje – kthehemi te qytetarët, atyre u tregoni se pse me 42% që nëntë muaj nuk ishit në gjendje të bënit koalicion qeverisës”, ka shkruar Bajrami në reagimin e saj ndaj Muratit.
