Presidentja Vjosa Osmani ka thënë se bota demokratike duhet të reagojë lidhur me rastin e rrëmbimit të një qytetari serb të Kosovës nga xhandarmëria serbe.
Osmani ka deklaruar se këto sulme të Serbisë që kanë për qëllim rrezikimin e paqes e stabilitetit në rajon.
Ajo i është drektuar me një thirrje edhe skenës politike në Kosovë, duke thënë se duhet të veprojë e flasë në një zë në mbrojtjen e Kosovës nga tendenca të tilla.
“Serbia, e cila çdo ditë bën propagandë e dezinformata për të drejtat e serbëve në Kosovë, ka plagosur dhe më pas ka kidnapuar një qytetar serb të Kosovës. Kjo është edhe një dëshmi shtesë e qasjes së saj hegjemoniste, ku çdo qytetar që guxon të flasë të vërtetën rreth regjimit autokratik të Vuçiqit, sulmohet dhe torturohet në mënyrën më barbare të mundshme. Bota demokratike duhet të reagojë e të ndalë këto sulme të Serbisë që kanë për qëllim rrezikimin e paqes e stabilitetit në rajonin tonë. Ndërkaq skena politike në Kosovë duhet të veprojë e flasë në një zë në mbrojtjen e Kosovës nga tendenca të tilla”, ka shkruar Osmani.
Edhe Ministri në detyrë i Punëve të Brendshme, Xhelal Sveçla, reagoi më herët dhe kërkoi reagimin e faktorit ndërkombëtar, duke thënë se po cënon hapur integritetin territorial të Kosovës.
“Kjo qasje agresive dhe provokuese e Serbisë është e papranueshme. Ajo përbën shkelje të rëndë të kufijve tanë shtetërorë dhe të të drejtave të qytetarëve tanë. Është koha e fundit që faktori ndërkombëtar të reagojë me veprime të qarta dhe ndëshkuese ndaj Serbisë, në mënyrë që këto akte armiqësore të mos përsëriten më kurrë”, ka shkruar Sveçla.
Ndryshe, Policia e Kosovës ka njoftuar se të shtunën e 1 nëntorit ka pranuar informacione për rrëmbimin dhe plagosjen nga xhandarmëria serbe e një qytetari serb të Kosovës në zonën e Leposaviqit.
Sipas hetimeve fillestare, policia thotë se persona të maskuar dyshohet se kanë hyrë nga Serbia, e kanë plagosur dhe rrëmbyer viktimën, duke e dërguar më pas në Nish.
Zona ku rasti ka ndodhur njihet edhe si “pika zero”, ku përgjegjëse është KFOR-i.
