I nominuari i partisë fituese për mandatar të dytë, Glauk Konjufca, tha se nuk e di sigurt nëse emri i tij i është dorëzuar presidentes së vendit, Vjosa Osmani.
“Nuk e di teknikisht a ka shkuar ende te presidentja, por kjo pritet të ndodhë në çdo moment”, iu tha ai gazetarëve pas mbledhjes së Këshillit të Përgjithshëm të partisë së tij ku u nominua për kryeministër.
Konjufca u pyet nëse ka siguruar ndonjë marrëveshje me partitë politike për të gjetur mbështetje në Parlament për qeverinë e re, por tha se qeveria që ai synon ta krijojë do të bëhej në bahskëpunim me partitë politike për të shmangur zgjedhjet potenciale në dhjetor dhe për të miratuar buxhetin.
“Ideja ka qenë e thjeshtë – ta krijojmë një qeveri të re për të shmangur dy gjëra shumë të rëndësishme. E para, zgjedhjet e menjëhershme dhe e dyta që të provojmë të bashkëpunojmë me partitë politike parlamentare që Kosova të mund ta ketë buxhetin e saj 2026”, tha ai.
Ndërkohë, partitë e mëdha shqiptare në Kuvend u deklaruan se tashmë i kanë treguar presidentes Osmani se asnjë parti s’e ka shumicën dhe se vendi duhet të shkojë në zgjedhje./Express/
