Glauk Konjufca, i votuar nga Këshilli i Përgjithshëm i Lëvizjes Vetëvendosje për kryeministër, u mandatua dje dhe nga presidentja e vendit, Vjosa Osmani, për të tentuar ta bëjë qeverinë e re, derisa këtë ka dështuar ta bëjë Albin Kurti.
Osmani në konferencën e djeshme tha se Konjufca e ka bindur se mund ta bëjë qeverinë, ndërsa që ky i fundit tha se nuk bën koalicione.
E, nga partitë ish opozitare nuk kanë lëvizur qëndrimet.PDK, LDK e AAK kanë deklaruar se nuk kanë votë për Konjufcën e asnjë mandatar të Vetëvendosjes.
Por, a pritet ta ketë fatin e Kurtit edhe Konjufca, që t’i ketë vetëm 56 vota, apo do të arrijë t’i bëjë numrat për formim të qeverisë? E nëse kjo dështon, a do të jenë zgjedhjet e parakohshme të pashmangshme?
Lidhur me këtë, ish diplomati Avni Arifi, thotë për Gazeta Blic se opsioni mund të jetë kontrabandimi i ndonjë deputeti apo koalicion me Listën Serbe, çka thotë se nuk beson se do të ndodhin ndonjëra.
“Duke pasur parasysh qëndrimet e para të katër partive ish opozitare, e vetmja formë e cila do t’ia bënte numrat Konjufcës mbetet kontrabandimi i ndonjë deputeti apo koalicion me Listën Serbe. Nuk besoj se do të ndodhë”, ka vlerësuar ai.Ndërsa, ish diplomatja Alma Lama, thotë për Gazeta Blic se Konjufca nuk i ka votat për formim të qeverisë së re.
Sipas saj, atij iu dha mandati nga presidentja për t’i shtyrë zgjedhjet.“Mendoj se Konjufca nuk i ka votat dhe kjo gjë nuk është një sekret pasi krejt subjektet politike kanë deklaruar se nuk do ta votojnë. Atij iu dha mandati nga presidentja për të shtyrë edhe më shumë afatin e zgjedhjeve, në mënyrë antikushtetuese”, u shpreh ajo.
Sipas Lamës, loja e Kurtit po vazhdon tani me ndihmën e Osmanit, por që do të ketë zgjedhje të reja në dhjetor.“Pra, është vazhdimësia e lojës politike të Kurtit tani me ndihmën e Osmanit. Besoj se do të ketë zgjedhje të tjera, në fund të dhjetorit siç po duket”, ka deklaruar Alma Lama
