Isa Mustafa, ish-Kryeministër i Kosovës, del të ketë goditur ‘nerv të keq’ të kabinetit presidencial me komentet e tij të fundit se pret “dredhi të radhës” nga Vjosa Osmani, Presidente e Kosovës, përkatësisht në rirreshtimin e saj me Albin Kurtit.
Learta Hollaj, këshilltare e Osmanit, ia ka dhënë një ‘rafall’ komentimeve të tij, duke shkruar se si Kosova “akoma po paguan” nga veprimet e Isa Mustafës.
“Në vend që të heshtë dhe të reflektojë për dështimet e veta politike çmimin e të cilave akoma e paguan Kosova, për mënyrën se si e zhbëri besimin e qytetarëve dhe e ktheu partinë e tij në një hije të vetvetes, ai zgjedh të sulmojë një lidere që në çdo hap e ka mbrojtur demokracinë, sovranitetin dhe dinjitetin e Kosovës”, shkroi ajo.
Çfarë tha Mustafa?
Për atë që Vjosa Osmani, Presidente e Kosovës, ka (ri)orbituar në kursin e Albin Kurtit, tash e disa muaj, për Isa Mustafën nuk përbën befasi. Ky i fundit veçse paranjofton “dredhi” të radhës nga ajo “për të mbetur në pushtet.
“Sa i përket presidentes, ajo është treguar një karrieriste dhe manipulante e paskrupullt politike. Deri tani ka miratuar dhe ekzekutuar të gjitha veprimet e qeverisë Kurti që kanë quar në izolimin politik dhe ekonomik të vendit. E ka lënë vendin pa kryeprokuror të shtetit, në disa raste e ka shkelë Kushtetutën dhe nuk ka reaguar asnjëherë në shjeljet kushtetuese nga qeveria. Edhe tani mund të presim dredhi të saj për të mbetur në pushtet”, tha Isa Mustafa për Nacionale ditë më parë.
