Dy bashkëpunëtorë të afërt të kryetarit të Komunës së Prishtinës, Përparim Rama, kanë paditur Kosovën në Tribunalin Ndërkombëtar të Arbitrazhit, duke kërkuar dëmshpërblim deri në 119 milionë euro për projektin “LakeSide Gardens – Badovc.
Ushtruesi i detyrës së ministrit të Drejtësisë, Blerim Sallahu, tha se padia lidhet me një projekt privat për ndërtimin e një lagjeje luksoze përreth liqenit të Badovcit.
Sipas tij e të paditurit janë bashkëpunëtorë të hershëm të Përparim Ramës dhe se projekti është realizuar në bashkëpunim me kompaninë 4M Group, në pronësi të vetë Ramës.
“Padia, e regjistruar me emrin “RR.H & Sh.H kundër Republikës së Kosovës”, ka për objekt projektin “LakeSide Gardens – Badovc”, një nismë private për ndërtimin e një lagjeje luksoze përreth liqenit të Badovcit. Të dy biznesmenët, të njohur si bashkëpunëtorë të hershëm të z. Rama, kishin blerë rreth 12.9 hektarë tokë për zhvillimin e projektit, ndërsa projektimi iu besua kompanisë 4M Group, në pronësi të vetë Përparim Ramës, i cili në çdo formë tentonte ta paraqiste projektin si më mbrojtës të mjedisit se mosndërtimin e tij dhe Kawa Group, kompanisë ndërtuese partnere”, ka shkruar ai.
Sallahu shtoj se investitorët kishin blerë 12.9 hektarë tokë për zhvillimin e projektit, që përfshinte 91 vila dhe një hotel luksoz, por projekti ishte ndalur pas reagimeve të ashpra qytetare, mbi 7000 nënshkrimeve.
Sipas Sallahut pas ndërprerjes së projektit, dy biznesmenët kanë dorëzuar padi ndaj shtetit të Kosovës, duke kërkuar 119 milionë euro.
“Është e rëndësishme të theksohet se, sipas një marrëveshjeje financiare të nënshkruar në vitin 2020 ndërmjet kompanisë 4M Group, Kawa Group dhe investitorëve, 66% e përfitimeve të projektit do t’u takonin kompanive, Kawa dhe asaj të Përparim Ramës, ndërsa vetëm 33% investitorëve. Kjo marrëveshje ngre dyshime të forta për konflikt interesi, ndikim politik në vendimmarrje, dhe favorizim të bizneseve të lidhura ngushtë me zyrtarë publikë, ku sistemi i drejtësisë duhet ta thotë fjalën e fundit për këtë rast”, ka shkruar ai në “Facebook”.
