Eksperti i ekonomisë, Jakup Bellaqa, ka shprehur mbështetje për rritjen e pagave dhe pensioneve të propozuara në projekt-buxhetin për vitin 2026, por ka theksuar se kjo rritje nuk është e mjaftueshme dhe ka ardhur shumë vonë.
Ai për “Expose”, prodhim i GazetaBlic ka thënë se, pavarësisht se ky buxhet është “i qytetarëve dhe për qytetarët”, do të kishte qenë më mirë që këto masa të ishin marrë më herët, pasi inflacioni ka vazhduar të rritet për çdo muaj.
“Unë e përshëndes këtë rritje, edhe pse nuk është e mjaftueshme, edhe pse është kohë fushate, por ky buxhet është i qytetarëve dhe për qytetarët,” ka thënë Bellaqa.
Ai shtoi se, sipas tij, inflacioni po rritet në nivele alarmante, me përqindjet që krahasuar me vitin e kaluar janë në rritje të vazhdueshme: “Inflacioni është duke u rrit jasht normales dhe në këtë rast do të duhej të intervenohej, të merren masa të frenohet, dhe instrumente të tjera që të indeksonte për inflacionin pagat, qoftë për sektorin publik, qoftë për atë privat dhe kategoritë pensionale.”
Sa i përket premtimit të pagës së 13-të për sektorin publik, Bellaqa ka theksuar se ky premtim është i rëndësishëm, por është “më shumë se 12 muaj për vitin e ardhshëm” dhe duhet të hyjë menjëherë në fuqi. Ai ka propozuar që rritja e pagave të jetë e shpejtë, duke filluar menjëherë pas rritjes së pensioneve.
Bellaqa gjithashtu ka kërkuar rritjen e pagave për 84,000 shërbyes civilë të administratës publike, duke argumentuar se inflacioni dhe rritja e çmimeve po dobësojnë fuqinë blerëse, dhe se pagat nuk mund të ndjekin këtë rritje të çmimeve.
“Administrata Publike dhe sektori publik janë duke mbajtur shtetin. Këto mjete, qoftë Dogana, Administrata Tatimore, apo sektorët e arsimit, shëndetësisë, policisë dhe ushtrisë, janë thelbësore për funksionimin e shtetit,” tha ai.
Në fund, Bellaqa ka folur për pagen minimale, duke e cilësuar atë si “më të ulëtën në rajon”, me vetëm 350 euro, një nivel që ai e konsideron të papërshtatshëm për të siguruar minimumin e jetesës. “Paga minimale ka qenë më e ulëta në rajon 350 euro, asnjë shtet nuk ka pas kësi page,” shtoi ai.
