Avokati Ivan Niniq ka publikuar në llogarinë e tij në X foto të makinës së shkatërruar të Millan Vukashinoviqit nga Leposaviqi, i cili u plagos nga forcat e xhandarmërisë serbe fundjavën e kaluar në rrethana të paqarta pranë fshatit Jelakce, dhe u transferua në një spital në Nish, ku mjekët po luftojnë për jetën e tij.
Niniq tha se “Vukashinoviq është qëlluar padyshim me një plumb serb, si një kafshë”.
Së bashku me këto pretendime, ai bashkëngjiti edhe foto të makinës së shkatërruar që i përkiste Vukashinoviqit, teksa bëri thirrje për bashkësinë ndërkombëtare që të reagojë pasi, sipas tij, “kjo është Banjska 2″.
“Makina e Milanit, e cila u shkatërrua gjatë sulmit ndaj tij, u gjet sot! I bëj thirrje EULEX-it dhe KFOR-it të kryejnë një hetim në vendngjarje, por komunitetit ndërkombëtar të reagojë, sepse kjo është ‘Banjska 2’”, tha avokati Niniq.
Institucionet tona të sigurisë kanë thënë se Vukashinoviq, serb i Kosovës, është qëlluar në brendësi të territorit të Kosovës nga forcat ushtarake serbe, e më pas edhe është rrëmbyer.
Ai më pas raportohet të jetë transferuar fillimisht në Prokuple dhe më pas në Nish, Serbi, ku mjekët raportohet se po luftojnë për jetën e tij.
Sipas Niniqit, Vukashinoviq u plagos nga të shtëna të shumta në shpinë, dhe siç pohoi ai, persona të veshur me uniforma ushtarake, por pa asnjë shenjë dalluese, në xhipa pa targa, dyshohet se ishin të përfshirë në të gjitha ato. Avokati gjithashtu ngre pyetjen nëse dikush tjetër, përveç anëtarëve të Ushtrisë Serbe, mori pjesë në të shtënat, të cilat ndodhën më 1 nëntor rreth orës 16:00.
Familja e të plagosurit dyshon se ka një përpjekje aktive për të parandaluar dhe penguar provat.
