Profesori i asociuar në Fakultetin e Mjekësisë të Universitetit të Prishtinës, Flamur Blakaj, është ndër zyrtarët publikë me më shumë angazhime të njëkohshme në sektorin publik dhe privat. Përveç funksionit të tij akademik, ai ushtron detyra edhe në Institutin e Mjekësisë Ligjore, bashkë me veprimtarinë në një biznes privat të regjistruar në emrin e tij.
Sipas deklarimit vjetor të dorëzuar më 29 mars 2025 në Agjencinë për Parandalimin e Korrupsionit, Blakaj ka raportuar disa poste zyrtare dhe një pasuri të konsiderueshme të përbërë nga prona të paluajtshme, mjete të luajtshme dhe llogari bankare.
Tri pozita në institucione publike dhe një biznes privat
Në dokumentin zyrtar, Blakaj ka deklaruar se: është profesor i asociuar në Fakultetin e Mjekësisë në Universitetin e Prishtinës, që nga 28 korriku 2020; punon si ekspert i mjekësisë ligjore në Institutin e Mjekësisë Ligjore, pozitë që e mban prej 17 tetorit 2017 si dhe është ekspert për dëme shëndetësore në kompaninë e sigurimeve SIGMA Vienna Insurance Group, që nga 1 prilli 2016.
Përveç këtyre, ai figuron si aksionar 100% në biznesin e tij privat “Zyra Shërbese EKS Blakaj B.I.”, të regjistruar më 4 qershor 2008, ku kryen shërbime të ekspertizës mjeko-ligjore.
Pasuri e paluajtshme me vlerë mbi gjysmë milioni euro
Në pjesën e pasurisë, Blakaj ka deklaruar gjithsej shtatë prona të paluajtshme:
një zyre me sipërfaqe 66.90 metra katror, blerë me kursime në vitin 2024, në vlerë 76,000 euro,
dy banesa me sipërfaqe që variojnë nga 51.40 m2 metra katrorë deri në, 118.31 të përfituara nga kursimet ose trashëgimia, me vlera që kalojnë 200 mijë euro.
një shtëpi 59 metra katrorë që kap vlerën e 45 mijë eurove.
dy truallë, njëri 385 metra katror në vlerë prej 75 mijë euro dhe një tjetër 14.20 ari që figuron në pronësi të bashkëshortes në vlerë prej 50 mijë euro.
Në kuadër të pasurisë së paluajtshme ai ka deklaruar edhe një garazhë 12.5 m2, 6 mijë euro.
Pasuria e paluajtshme e Blakajt është afro gjysmë milioni.
Dy vetura dhe depozita bankare mbi 70 mijë euro
Në pasuritë e luajtshme, Blakaj ka deklaruar dy automjete:
një veturë e blerë në vitin 2022 për 20,000 euro, në bashkëpronësi me bashkëshorten,
dhe një tjetër e vitit 2014, me vlerë 9,000 euro, në pronësi personale.
Ai ka raportuar gjithashtu nëntë llogari bankare në institucione të ndryshme në Kosovë, përfshirë ProCredit Bank, BKT, NLB, TEB dhe Raiffeisen Bank, me shumën e përgjithshme mbi 70,000 € të deponuara.
Mjetet, sipas dokumentit, rrjedhin nga paga, kursimet dhe honoraret profesionale.
Të ardhurat vjetore nga disa burime
Nga funksionet që mban, Blakaj ka raportuar të ardhura të shumta:
7,572 euro nga Ministria e Drejtësisë për shërbime ekspertize,
16,270 euro nga Zyra e tij private “EKS Blakaj”,
15,600 euro nga Universiteti i Prishtinës,
11,286 euro nga SIGMA Vienna Insurance Group,
dhe të ardhura shtesë më të vogla nga shitja e librave universitarë dhe honorare të tjera.
Në total, të ardhurat e deklaruara për vitin e fundit kalojnë 50 mijë euro.
Në deklarim, profesori ka bërë të ditur edhe një kredi aktive në Bankën Kombëtare Tregtare, në vlerë 50,000 €, marrë për blerje zyre, me afat shlyerjeje deri më 5 shkurt 2029.
Blakaj nuk ka raportuar zotërim të letrave me vlerë apo kriptovalutave dhe asnjë donacion ndaj partive politike apo shpenzime të tjera të kësaj natyre./Insajderi
