Kryetari i Partisë Demokratike të Kosovës, Memli Krasniqi, ka reaguar pas shqetësimeve të raportuara nga komisionerët e PDK-së në Mitrovicë lidhur me integritetin e procesit zgjedhor.
Ai ka bërë të ditur se partia ka ndërmarrë të gjitha veprimet e nevojshme për mbrojtjen e vullnetit të qytetarëve. “Prej mbrëmë, menjëherë pas njoftimit nga komisionerët tanë në Mitrovicë për shqetësimet rreth integritetit të procesit zgjedhor atje, kemi ndërmarrë të gjithë hapat e nevojshëm për mbrojtjen e vullnetit të qytetarëve,” ka deklaruar Krasniqi.
Sipas tij, “shqetësimet e paraqitura janë serioze dhe, si të tilla, po i adresojmë në të gjitha instancat dhe adresat përkatëse.” Krasniqi ka njoftuar se sot, PDK do të dorëzojë ankesën zyrtare në Panelin Zgjedhor për Ankesa dhe Parashtresa, “brenda afatit ligjor,” ndërsa në ora 12:00, në selinë qendrore të partisë, do të mbahet një konferencë për media “për të bërë të ditura detajet dhe veprimet tona lidhur me këtë çështje.”
Ai theksoi se mbrojtja e votës është detyrë ligjore dhe morale: “Ne besojmë se çdo votë është zëri i qytetarit dhe themeli i demokracisë sonë. Prandaj, kur ekzistojnë dyshime apo paqartësi në proces, është e drejtë dhe detyrë ligjore që ato të shqyrtohen me kujdes dhe plotësisht nga institucionet përkatëse.” Në fund, kryetari i PDK-së nënvizoi se partia do të veprojë me përgjegjësi dhe qetësi, pa paragjykuar rezultatin përfundimtar:
“Pa paragjykuar rezultatin përfundimtar, PDK kërkon që çdo procedurë të trajtohet me transparencë, drejtësi dhe në përputhje me ligjin, në mënyrë që besimi i qytetarëve në procesin zgjedhor të mbetet i plotë. Vota është e shenjtë në demokraci dhe PDK është e vendosur ta mbrojë integritetin e zgjedhjeve dhe vullnetin e vërtetë të votuesve me përgjegjësi, qetësi dhe bindjen e plotë se e vërteta do të dalë në dritë.”
