Analisti Albert Krasniqi tha se ka dyshime të forta për manipulim të procesit zgjedhor në Mitrovicën e Jugut.
Ai tha se “faktet janë kokëforta” dhe ka radhitur disa prej tyre dhe thotë se ato ndodhën vetëm në Mitrovicë.
Krasniqi tha se vetëm në këtë komunë s’u përputhen rezultatet e Exit Poll-it me ato zyrtare, pjesëmarrja ishte më e madhe në raundin e dytë se në të parin dhe se kandidati i PDK-së, Arian Tahiri, ishte i vetmi që mori më pak vota në raundin e dytë se në të parin.
Përveç kësaj, Krasniqi tha se “menaxhimi institucional ka qenë i papranueshëm”, duke thënë se KQZ-ja u ngut për t’i shpallë gabim teknik dyshimet për fletëvotimet që nuk i përkisnin vendvotimeve.
Ai tha se e dyshimtë është edhe se si kompania që shtypi fletëvotimet brenda pak orësh e mori përgjegjësinë për një “gabim teknik” pa verifikuar dhe se Prokuroria u mjaftua me deklarata të kompanisë.
Postimi i plotë:
Rezultatet e raundit të dytë në Mitrovicë ngrejnë dyshime të forta për manipulim të procesit zgjedhor. Faktet janë kokëforta:
1. Exit poll-i nuk përputhet me rezultatet zyrtare – vetëm në Mitrovicë.
2. Pjesëmarrja më e madhe se në raundin e parë – ndër komunat e mëdha, vetëm në Mitrovicë.
3. Kandidati i vetëm që ka marrë më pak vota se në raundin e parë – sërish vetëm në Mitrovicë.
4. Fletëvotime të gabuara që nuk i përkasin vendvotimit.
Përtej fakteve zgjedhore, menaxhimi institucional ka qenë i papranueshëm:
5. KQZ u ngut ta shpallë “gabim teknik” pa hetim paraprak.
6. Kompania e shtypjes mori përgjegjësinë brenda pak orësh – pa asnjë verifikim serioz.
7. Prokuroria u mjaftua me deklarata të kompanisë.
8. Tenderi u dha si kontratë njëburimor, ndonëse kishte kohë të mjaftueshme për konkurrencë.
9. Kompania ka lidhje të njohura me eksponentë të partisë në pushtet.
10. Shteti dhe burimet publike janë keqpërdorur për qëllime elektorale – kush e përdor aparatin shtetëror për pushtet, mund ta përdorë edhe për vota.
Mitrovica duhet të shkojë në rivotim për të mbrojtur integritetin e zgjedhjeve dhe demokracinë. Nëse e pranojmë këtë si “gabim teknik”, nesër asgjë s’do të garantojë që vota jonë vlen. Po bëjmë regres, për të mbrojtur diçka që e kishim tejkaluar: zgjedhjet e lira dhe të ndershme.
