Kryetari i dorëhequr i PDK-së, Memli Krasniqi, ka akuzuar kryeministrin në detyrë, Albin Kurtin, duke pretenduar se në zgjedhjet e 9 shkurtit në Mitrovicë ka pasur “manipulim të paprecedentë të votave”.
Në emisionin “Rubikon” në Klan Kosova, Krasniqi tha se në këtë proces zgjedhor “është keqpërdorur pushteti dhe autoriteti shtetëror në garë kundër një partie politike dhe kandidatit të saj, Arian Tahirit”.
“Në Mitrovicë ka ndodhur diçka e paprecedentë. E para është keqpërdorur pushtetit dhe autoriteti, e institucioni shtetëror në garë kundër një partie politike, dhe kundër një kandidati, këtë rast, Arian Tahirit. Ka ndodhur diçka, që unë asnjëherë nuk e kam pa, të paktën në një shtet normal demokratik, ku kryeministri me ministra e deputetë, deri në organet e drejtësisë, e krejt atë mekanizimin institucional e ka shfrytëzuar për t’u munduar me e mposht një djalë të ri në Mitrovicë”, u shpreh Krasniqi.
Ai shtoi se kryeministri Kurti ka ndërhyrë drejtpërdrejt në procesin zgjedhor përmes “vendimeve abuzive me vlera qindra miliona euro”, të cilat sipas tij janë përdorur për të ndikuar tek qytetarët.
“Ka marrë vendime abuzive, qindra miliona eurosh, për me u mundu me mashtru njerëz me 100 euro, qoftë për studentë, qoftë për pensionistë, dhe krejt për një qëllim, me fitu në komunën e Mitrovicës”, u shpreh Krasniqi.
Krasniqi akuzoi Kurtin se ka humbur racionalitetin politik dhe se veprimet e tij në raport me Mitrovicën tregojnë mungesë të arsyeshmërisë.
