Presidenti i Shteteve të Bashkuara, Donald Trump, ka nënshkruar një projektligj me të cilin rihapet qeveria dhe i jepet fund mbylljes më të gjatë të saj në historinë e vendit.
Ai e shndërroi në ligj me nënshkrimin e tij projektligjin me afat të shkurtër vetëm disa orë pasi Dhoma e Përfaqësuesve votoi me 222 vota “për” e 209 “kundër” miratimit të mërkurën në mbrëmje dhe dy ditë pasi edhe Senati gjithashtu me rezultat të ngushtë e kishte miratuar legjislacionin, raporton televizioni BBC.
Duke folur në Zyrën Ovale, Trumpi tha se qeveria tani “do t’i vazhdojë operacionet normale”, pasi “njerëzit ishin dëmtuar aq keq” nga mbyllja 43-ditore.
Shumë agjenci qeveritare e kanë pezulluar punën nga tetori dhe rreth 1,4 milion punonjës federalë kanë qenë duke qëndruar në pushim pa pagesë ose duke punuar pa paga. Edhe asistenca ushqimore për personat me të ardhura të ulëta ishte në rrezik, ndërsa ka pasur pengesa edhe në realizimin e trafikut ajror.
Shërbimet qeveritare pritet të rikthehen ditëve në vijim, ndërsa pengesat në trafikun ajror me gjasë do të lehtësohen para Ditës së Falënderimeve. Administrata Federale e Aviacionit e kishte pakësuar trafikun ajror për shkak të mungesës së stafit, pasojë e mbylljes qeveritare.
Kjo gjendje ndikoi tek anëtarët e Kongresit që po mundoheshin të arrinin në kryeqytet të mërkurën për votimin e projektligjit në Dhomën e Përfaqësuesve.
Republikani Derrick Van Orden udhëtoi me motoçikletën e vet për gati 1.600 kilometra për ta hedhur votën në Dhomën e Përfaqësuesve para se projektligji t’i dërgohej presidentit Trump për ta nënshkruar.
Sidoqoftë, me këtë projektligj sigurohet qëndrimi hapur i qeverisë vetëm deri më 30 janar, kur ligjvënësve edhe një herë do t’u duhet që të gjejnë një mënyrë për financimin e shërbimeve qeveritare.
Para se ta nënshkruante ligjin, Trumpi në mënyrë të përsëritur ia la fajin për mbylljen Partisë Demokratike në opozitë. “Ata e bënë këtë thjesht për arsye politike” – tha kreu i Shtëpisë së Bardhë.
