Deputeti i PDK-së, Enver Hoxhaj, ka kërkuar që Konventa e kësaj partie për të zgjedhur kryetarin e ri të shtyhet deri të dielën e ardhshme.
Pas kërkesës së Hoxhajt ka ardhur një përgjigje nga Sekretarja e Përgjithshme e kësaj partie, Vlora Çitaku.
Çitaku ka bërë me dije se Konventa e Jashtëzakonshme është thirrur në bazë të nenin 35 të Statutit të Partisë.
Ajo ka thënë se sipas statutit, Konventa duhet të mbahet brenda pesë ditësh.
Në mbledhjen e fundit të Kryesisë, pas dorëheqjes së Kryetarit Memli Krasniqi, Kryesia vendosi të thërrasë Konventën e Jashtëzakonshme, e cila, bazuar në nenin 35 të Statutit të Partisë, duhet të mbahet brenda pesë ditësh. Ne e inkurajojmë dhe e mirëpresim garën e brendshme. Çdo anëtar apo anëtare që i plotëson kriteret e përcaktuara me Statut është i mirëseardhur të kandidojë. Gara do ta bënte Konventën edhe më madhështore”, ka deklaruar Çitaku për Nacionale.
Në lidhje me kërkesën e Hoxhajt ndaj PDK-së ka folur për “Gazeta Blic” ish-deputeti i kësaj partie, Hisen Berisha.
Berisha tha se çdo propozim apo debat brenda partisë duhet trajtuar si pjesë e procesit të shëndetshëm politik.
Ai tha se kërkesa e Hoxhajt duhet parë si pjesë e reflektimit të nevojshëm që ky moment kërkon për PDK-në.
“PDK është parti me institucione të qëndrueshme të brendshme dhe me kulturë demokratike të konsoliduar.Çdo debat apo propozim brenda partisë duhet trajtuar si pjesë e procesit të shëndetshëm politik. Në këtë kontekst, kërkesa e z. Hoxhaj për shtyrjen e Konventës duhet parë si pjesë e reflektimit të nevojshëm që ky moment kërkon për PDK-në” tha Berisha.
Ish-deputeti, Berisha, tha se për të me e rëndësishme se koha e mbajtjes së Konventës është uniteti, reflektimi dhe drejtimi strategjik që duhet të marrin si parti.
Ai tha se kjo Konventë që pritet të mbahet duhet të jetë ‘moment bashkimi jo ndarje’.
“Për mua, më i rëndësishëm se koha e mbajtjes së Konventës është uniteti, reflektimi dhe drejtimi strategjik që duhet të marrim si parti. Konventa duhet të jetë moment bashkimi, jo ndarje, prandaj çdo qëndrim që synon rritjen e kohezionit të brendshëm dhe forcimin e organizatës është pozitiv dhe i dobishëm për procesin.Shtyrja nuk mund të trajtohet si dobësi, por duhet parë si veprim i matur nëse shërben për stabilitetin, përgatitjen dhe qartësimin e vizionit kolektiv. Vendimi final për datën i takon institucioneve të partisë, të cilat duhet të vendosin me përgjegjësi dhe në funksion të interesit të PDK-së dhe të shtetit” tha Berisha në përgjigjen e dhënë për “Gazeta Blic”.
