Këshilli Koordinues i Shoqatave të Dala nga Lëvizja dhe Lufta Çlirimtare e Popullit Shqiptar ka bërë thirrje për protestë të madhe që do të mbahet më 16 nëntor 2025 në Strasburg. Në komunikatë thuhet se, ky këshill shpreh shqetësimin e thellë ndaj padrejtësive që po bëhen në emër të drejtësisë ndërkombëtare kundër luftëtarëve të lirisë dhe ish udhëheqësve të Republikës së Kosovës.
Në njoftim thuhet se Gjykata Speciale ka marrë karakter selektiv, dhe, në vend që të ndëshkojë krimet dhe gjenocidin e kryer nga Serbia, kjo gjykatë është kthyer në një proces politik ndaj vetë Luftës Çlirimtare të Kosovës.
‘’ Ushtria Çlirimtare e Kosovës (UÇK) ishte ndërmarrja më e madhe kombëtare e popullit shqiptar për çlirimin e tokave të pushtuara. Ajo nuk ishte thjesht një luftë për territor, por një përpjekje për liri, për dinjitet dhe për t’u bërë pjesë e barabartë e familjes evropiane të popujve të lirë’’, thuhet mes tjerash.
Komunikata:
KËSHILLI KOORDINUES I SHOQATAVE TË DALA NGA LËVIZJA DHE LUFTA ÇLIRIMTARE E POPULLIT SHQIPTAR
THIRRJE PUBLIKE PËR PROTEST
Për të protestuar në Strasburg, më 16 nëntor 2025, kundër procesit të padrejtë që po zhvillohet në Hagë nga Gjykata speciale ndaj luftëtarëve të lirisë dhe ish drejtuesve të Republikës së Kosovës.
Në Prishtinë, më 13 nëntor 2025 Këshilli Koordinues i Shoqatave të dala nga Lëvizja dhe Lufta Çlirimtare e popullit shqiptar shpreh shqetësimin e thellë dhe indinjatën e drejtë ndaj padrejtësive që po bëhen në emër të drejtësisë ndërkombëtare kundër luftëtarëve të lirisë dhe ish udhëheqësve të Republikës së Kosovës.
Themelimi dhe veprimtaria e Gjykatës speciale për Kosovën kanë marrë karakter të njëanshëm dhe selektiv. Në vend që të ndëshkojë krimet dhe gjenocidin e kryer nga Serbia pushtuese ndaj popullit shqiptar, kjo gjykatë është kthyer në një proces politik ndaj vetë Luftës Çlirimtare të Kosovës — luftë e drejtë, çlirimtare dhe mbrojtëse, e përkrahur nga shteti ynë Amë, nga NATO dhe nga bota demokratike.
Ushtria Çlirimtare e Kosovës (UÇK) ishte ndërmarrja më e madhe kombëtare e popullit shqiptar për çlirimin e tokave të pushtuara. Ajo nuk ishte thjesht një luftë për territor, por një përpjekje për liri, për dinjitet dhe për t’u bërë pjesë e barabartë e familjes evropiane të popujve të lirë.
Raporti famëkeq i Dik Martit mbi “trafikimin e organeve” është dëshmuar si i pavërtetë dhe i fabrikuar. Megjithatë, mbi bazën e këtij raporti të rremë, prej më shumë se pesë vitesh po zhvillohet një proces maratonik e i padrejtë ndaj ish-luftëtarëve të UÇK-së, proces që dëmton rëndë imazhin e Kosovës dhe besimin në drejtësinë ndërkombëtare.
Lëvizja Kombëtare Shqiptare dhe më pas Lëvizja Popullore e Kosovës, të cilës i përkisnin shumë prej këtyre burrave të lirisë, nuk luftuan vetëm për çlirimin territorial të vendit, por edhe për çlirimin e njeriut shqiptar nga prangat e varfërisë, të prapambeturisë, të ndasive fetare dhe të mungesës së emancipimit shoqëror e politik. Synimi i tyre ishte një komb i lirë, i bashkuar, demokratik e i zhvilluar — pjesë dinjitoze e Evropës moderne.
UÇK-ja është pasuri e përbashkët kombëtare, vlerë historike dhe morale që bashkon shqiptarët pa dallim bindjeje, krahine, partie e feje. Mbrojtja e vlerave të saj është detyrë kombëtare e çdo institucioni, partie e shoqate shqiptare, kudo që jetojnë e veprojnë shqiptarët.
Ne kërkojmë drejtësi të vërtetë, jo drejtësi selektive; respekt për sakrificën, jo dënim të historisë sonë. Lufta Çlirimtare e popullit shqiptar në Kosovë ishte, është dhe do të mbetet faqe e lavdishme e historisë sonë kombëtare — vlerë evropiane e lirisë dhe e drejtësisë.
Prandaj, Këshilli Koordinues i Shoqatave të dala nga Lëvizja dhe Lufta jonë Çlirimtare kërkon shfuqizimin e Rezolutës që çoi në krijimin e Gjykatës speciale dhe rishikim të gjithë procesit që çoi në krijimin e kësaj Gjykate të padrejtë.
Lavdi dëshmorëve të kombit!
Nderim dhe mirënjohje për të gjithë luftëtarët e lirisë!
Falënderim e Mirënjohje për Mërgatën tonë, që ishte dhe mbeti krah i fuqishëm i përpjekjeve dhe i Luftës Çlirimtare të kombit tonë, krah i fuqishëm i zhvillimit dhe përparimit të Atdheut tonë të përbashkët!
