Deputeti i Lidhjes Demokratike të Kosovës, Avdullah Hoti, ka thënë se deklarata e presidentes Vjosa Osmani për shkatërrimin e bandave kriminale, është një ‘’autogol diplomatik’’ që i bëhet Kosovës, dhe jo vetëm një ‘’statistike e rreme’’.
Hoti ka thënë se deklaratat si të Osmanit e ulin kredibilitetin e vendit dhe e dëmtojnë imazhin e kësaj të fundit, duke e vendosur Kosovën në listë me vendet problematike të botës.
‘’ Sigurisht se ky i fundit nuk është rasti i vetëm. Dëmi po mbetet, pavarësisht sqarimit, që po e dëshmon mungesën e seriozitetit. Kështu ndodh kur tentohet të përdoret çdo medium, në vend e jashtë, për t’i shërbyer partnerit të saj në krye të qeverisë’’, ka shkruar ai mes tjerash.
Postimi:
“900 banda kriminale të shkatërruara” nuk është vetëm një statistikë e rreme, por është autogol diplomatik që i bëhet Kosovës. Kjo nuk tregon sukses, por i jep botës mesazhin e rremë se Kosova është e zhytur në krim të organizuar.
Deklarata të tilla tragjikomike e ulin kredibilitetin e Kosovës dhe e dëmtojnë imazhin, duke e vendosur në listë me vendet problematike të botës.
Kosova ka nevojë për lidership dinjitoz, serioz dhe të përgjegjshëm.
Sigurisht se ky i fundit nuk është rasti i vetëm. Dëmi po mbetet, pavarësisht sqarimit, që po e dëshmon mungesën e seriozitetit.
Kështu ndodh kur tentohet të përdoret çdo medium, në vend e jashtë, për t’i shërbyer partnerit të saj në krye të qeverisë.
Detyrë e saj është të merret me ndërprerjen të partneritetit strategjik me SHBA, me sanksionet nga BE, me funksionimin joligjor të qeverisë, me emërimin e kryeprokurorit e raste të tjera. Këto i ka harruar. Fundi po vjen, asnjë rezultat, vetëm shërbim me devotshmëri në agjendën shtetrrënuese të partnerit të saj.
Ndryshe sot, Osmani ka thënë se ajo e ka pasur fjalën për ‘’numrin rasteve’’ dhe jo numrin e bandave kriminale, në deklaratën e saj të dhënë për Politico, për luftën ndaj krimit.
