Deputeti i LDK’së, Arben Gashi ka reaguar ashpër ndaj mënyrës se si janë thirrur dy seancat e nesërme të Kuvendit, duke e përshkruar situatën si shembull të qartë të kaosit institucional në të cilin, sipas tij, është futur vendi.
Ai thotë se seanca e parë, e caktuar për ora 11:00, parashikon formimin e komisioneve parlamentare, veprim që e quan shkelje të hapur të Rregullores dhe të logjikës kushtetuese. Sipas Gashit, komisionet mund të formohen vetëm kur ka pozitë dhe opozitë të qartë, gjë që aktualisht mungon, prandaj çdo komision i ri do të ishte ilegjitim.
Gashi kritikon edhe futjen në rend dite të pesë marrëveshjeve ndërkombëtare, të cilat kërkojnë komisione funksionale dhe 80 vota për miratim – kushte që ai thotë se nuk ekzistojnë fare në këtë klimë politike.
Ai e quan kulm të absurdit faktin që një qeveri në detyrë ka futur edhe projektbuxhetin për vitin 2026, duke e konsideruar këtë si shkelje procedurale dhe kushtetuese që sfidon çdo standard të qeverisjes.
Në listën e kritikave përfshihen edhe buxhetet e Prishtinës, Gjilanit, Zubin Potokut dhe RTK-së, të cilat Gashi i cilëson si tema të ndjeshme që nuk trajtohen pa qartësuar shumicën parlamentare dhe pa komisione të formuara.
Sipas tij, seanca e orës 14:00 është vendimtare. Nëse dështon, nis automatikisht numërimi për 40 ditë deri te zgjedhjet e reja të përgjithshme.
Gashi thekson se vendi po futet në një tjetër spirale zvarritjesh e përçarjesh, me rrezik që as zgjedhjet e ardhshme të mos sigurojnë stabilitet.
Sipas tij, kjo situatë nuk është zgjidhje, por thellim i krizës.
“Zoti e ruajt Kosovën.”
