Deputeti i Vetëvendosjes, Hekuran Murati dhe ai i PDK’së, Përparim Gruda, që është i vetmi nga partitë tjera që po merr pjesë, janë përplasur në seancën e sotme. Më pas është përfshirë edhe Albulena Haxhiu.
Gjithçka nisi pasi Gruda tha se Kuvendi nuk mund të mbajë seanca pa u formuar Qeveria, duke e cilësuar këtë të sotmen për buxhetin si kundërkushtetuese.
“Kjo nuk qëndron. Nuk është e shkruar askund një gjë e tillë… Fakti që deputeti Gruda është sot këtu, tregon edhe për disonancën Brenda partisë….Po e shoh që është në siklet sepse si jurist po i nevojitet të thotë gjëra të pavërteta”, tha Murati.
Gruda i replikoi ku tha se fakti që VV e ka vendosur Muratin që të flasë për çështjet juridike, tregon “sa seriozisht e merr” kjo parti “Kushtetutën e Ligjin.
“Fakti që VV ka vendos që çështjet juridike t’i mbroj përmes Ministrit të Financave, tregon sa shumë seriozisht e keni marrë Kushtetutën e Ligjin. Unë nuk mendoj që e keni ba punën as si ekonomist mirë…Nuk e kuptoj pse e bën atë lexim, se s’je jurist”, tha Gruda.
Këtu pastaj u përfshi ish-Ministrja e Drejtësisë, Albulena Haxhiu.
“Ligji na lejon që kjo qeveri në detyrë që të dërgojmë buxhet në Kuvend”, tha Haxhiu, teksa i akuzoi partitë që po e bojkotojnë seancën se janë bërë bashkë me Listën Serbe.
Haxhiu shkoi më tej ku tha se do të duhej të përgjigjeshin penalisht të gjithë që po tentojnë ta fusin vendin në krizë sociale.
“Me pas Prokurori të përgjegjeshme e profesionale, të gjithë ata që tentojnë me fut vendin në krizë sociale, ish dashtë me u përgjigj penalisht”, tha Haxhiu.
“Ne s’jemi si ju. Shkojmë në zgjedhje e pastaj qytetarët ua japin ndëshkimin”, shtoi ajo.
Gruda iu kundërpërgjigj edhe asaj.
“Me pas një vend minister të drejtësisë një person që s’dallon kufizimet prej përjashtimeve”.
