Analisti politik, dikur i njohur për përkrahjen e tij ndaj Vetëvendosjes, Shenoll Muharremi, ka komentuar zhvillimet e fundit politike, duke deklaruar se vendi po hyn në një fazë të re shumë më të ndërlikuar në aspektin institucional. Sipas tij, nëse pas zgjedhjeve të 9 shkurtit ishte e vështirë formimi i institucioneve, tani procesi do të jetë edhe më i ndërlikuar – përveç nëse partitë kuptojnë se pas 28 dhjetorit kompromisi është rruga e vetme përpara.
Muharremi thekson se Kosova po hyn në një cikël politik ku, përveç shumicës prej 61 votash, duhet të sigurohen edhe 81 vota për zgjedhjen e presidentit, çka e bën situatën edhe më të koklavitur. Sipas tij, kjo e shndërron periudhën paszgjedhore në një sfidë të madhe, ose në një proces të lehtë nëse subjektet politike pranojnë domosdoshmërinë e një kompromisi të gjerë.
Ai vlerëson se për të arritur 81 vota do të nevojiten disa parakushte të pashmangshme: LVV duhet të jetë pjesë e marrëveshjes, përveç nëse ndëshkohet rëndë nga elektorati më 28 dhjetor. Përveç saj, në ekuacion duhet të jetë LDK – e cila shihet si opsioni më i pranueshëm – ose PDK. Ai nuk e përjashton as një kombinim më kompleks ku të dyja partitë tradicionale mund të bëhen pjesë e një formule më të gjerë për stabilitet dhe normalitet.
Sa i përket rezultateve zgjedhore, Muharremi parashikon se LVV mund të vazhdojë procesin e rënies nga kulmi i vitit 2021, duke u pozicionuar rreth 35 për qind. Ndërkohë, sipas tij, LDK pritet të ruajë trendin e rritjes, kurse PDK mund të përballet me pasiguri për shkak të elektoratit të ri dhe ndryshimeve të fundit.
Analisti konkludon se pjesa e parë e vitit 2026 do të sjellë ndryshime të mëdha politike. Sipas tij, është shumë e mundshme që LVV dhe Albin Kurti të mos e drejtojnë më qeverinë, por të mbeten aktorë me ndikim të rëndësishëm. Në këtë kuadër, Muharremi e sheh të mundshme që Albin Kurti të jetë presidenti i ardhshëm i Kosovës, si pjesë e kompromisit që do të duhej ta stabilizonte skenën politike të vendit.
