Personat që po shfaqen në pamjet që aktualisht po shihni janë Ministri në detyrë i Infrastrukturës, Hysen Durmishi, dhe një pjesëtar i familjes Shabani, pronarë të kompanisë “Bageri”, e cila ndër vite ka fituar tenderë milionësh në dikasterin e udhëhequr nga Vetëvendosja.
Takimi, videoja e së cilit po publikohet për herë të parë nga VOX Kosova, besohet të jetë zhvilluar para më shumë se një viti, por diskutimet nga aty po japin ende fryte.
Një muaj para mbajtjes së zgjedhjeve të jashtëzakonshme në Kosovë, miqtë e Ministrit në detyrë të Infrastrukturës, Hysen Durmishi, po vazhdojnë të pasurohen nga buxheti i shtetit.
Kompania “Bageri Sh.P.K.”, ku dikur punonte Durmishi, është shpërblyer sërish me kontratë në tenderin për mirëmbajtjen dimërore të rrugëve nacionale dhe rajonale.
Vlera totale e tenderit të fituar është 559 mijë e 664 euro për pjesën e tretë të kontratës.
Për më tepër, kontrata me këtë kompani është lidhur në formë njëburimore – çka nënkupton se kjo kompani është ftuar të ofertojë.
Por nuk mbaron me kaq. Në LOT-in për të cilin u shpërblye, kjo kompani ishte e vetmja në garë, pra e vetmja që ofertoi, pa kundërshtarë.
VOX Kosova ka pyetur në lidhje me këtë çështje Leutrim Shabanin, pronarin aktual të firmës, mirëpo i njëjti nuk është përgjigjur.
Leutrimi është djali i Bujar Shabanit, një miku të vjetër të Hysen Durmishit, në një kohë kur ky i fundit madje edhe ishte angazhuar në kompaninë “Bageri”, ku pronarë janë pikërisht familja Shabani.
VOX Kosova ka pyetur edhe vetë Durmishin për raportet aktuale që ka me familjen Shabani dhe tenderin e fituar së fundmi nga kjo kompani, por edhe ky ka zgjedhur të heshtë.
Këto rrethana e vendosin ministrin Hysen Durmishi në qendër të dyshimeve për ndikim të mundshëm në favor të një rrethi të afërt biznesor, duke vënë në pikëpyetje integritetin e procesit publik.
Në këtë kontekst, zgjedhja e tij për të heshtur nuk i shuan shqetësimet, por vetëm sa e rrit nevojën për sqarim të qartë dhe llogaridhënie të plotë.
