Zgjedhjet e parakohshme parlamentare të 28 dhjetorit pritet të jenë një moment vendimtar për skenën politike në Kosovë.
Me një fushatë të shkurtër dhe sfida të shumta politike, partitë po përgatiten për një garë të ngushtë ku qytetarët do të vendosin për drejtimin e ardhshëm të vendit.
Lidhur me pritshmëritë që ka për zgjedhjet e jashtëzakonshme të dhjetorit është prononcuar për “Front Online”, ish-deputeti i Lëvizjes Vetëvendosje, Haki Abazi.
Abazi ka deklaruar se për zgjedhjet e 28 dhjetorit, përgjegjësinë kryesore për situatën aktuale politike e mban vetë LVV.
Sipas tij, koston e sabotimit të institucioneve për më shumë se një vit nuk ka kush ta paguaj përveç se LVV.
“Koston e sabotimit të institucioneve më shumë se një vit nuk ka kush ta paguaj përveç se LVV, një vit sabotim total, fragmentim prej bashkësisë ndërkombëtare”, u shpreh ai.
Abazi paralajmëroi se fushata e shkurtër zgjedhore kërkon kujdes.
Sipas tij, ekziston rreziku që kryeministri në detyrë, Albin Kurti të përpiqet t’ia hedhë fajin dikujt tjetër.
“Duhet me pas kujdes në fushatë që mos me krijuar shumë mundësi për Kurtin që fajin e tij të ja hedh dikujt tjetër do të jetë e vështirë se periudhë e fushatës shumë e shkurtër”, deklaroi Abazi
Abazi, është shprehur se në zgjedhjet e ardhshme pret rritje të forcave opozitare, duke theksuar se LVV ka shënuar regres në krejt aspektet.
Ai tha se rezultati zgjedhor varet nga mobilizimi i partive, por beson se qytetarët po kërkojnë alternativë.
“Varet nga mobilizimi i partive por jam i bindur që do të ketë rritje të opozitës në këto zgjedhje se LVV regres në krejt aspektet ka bërë me politik inatçorë e të dëmshme”, shprehet Abazi.
Sipas Abazit, kjo është arsyeja pse Kurti është i heshtur për veriun dhe nuk flet më asnjë fjalë.
“Çështjen e veriut më nuk mund të përdor Kurti se po shihet qartë që Lista Serbe është kthyer plotësisht në veri dhe nuk mund të thuhet që aty është bërë revolucion. Kjo është arsyeja pse Kurti është i heshtur për veriun dhe nuk fletë asnjë fjalë më”, thotë Abazi
