Kryeministri izraelit, Benjamin Netanyahu, u takua ndaras të martën me ministrin e Mbrojtjes, Israel Katz, dhe me komandantin e ushtrisë, Gjeneral Lejtënant Eyal Zamir, në përpjekje për të depërshkallëzuar një përplasje publike mes dy zyrtarëve të lartë të sigurisë, raportojnë mediat izraelite.
Katzi dhe Zamiri u përplasën të hënën, pasi ministri dha urdhër për rihetimin e hulumtimit të jashtëm nga ushtria për hetimet e mëhershme të brendshme rreth dështimeve për parandalimin e sulmit të udhëhequr nga Hamasi më 7 tetor 2023, raporton gazeta “The Times of Israel”.
Zamiri gjithashtu e akuzoi Katzin për ndërhyrje politike dhe për dëmtim të nivelit të përgatitjes së ushtrisë duke I ngrirë promovimet në pozita të larta për 30 ditë. Këto promovime në detyrë duhet të miratohen nga ministri i Mbrojtjes.
Përderisa në raportime të hënën thuhej se Netanyahu kishte synuar që t’i bënte bashkë në takim Zamirin dhe Katzin, ai në fund vendosi që fillimisht të takohej vetëm me ministrin e tij, e më pas me komandantin e ushtrisë.
Në raportimet e se martës thuhej se një takim ku do të ishin të pranishëm tre zyrtarët e lartë kishte pak gjasa që të mbahej, pasi disa spekuluan se Katzi mund të kishte refuzuar një të tillë.
Disa media raportuan se në takimet e ndara, Netanyahu kërkoi që Katzi dhe Zamiri t’i ulnin tensionet në publik dhe ta hiqnin përplasjen e tyre nga kryetitujt e gazetave.
Katzi ka qenë duke kundërshtuar një fushatë disamujore kundër Zamirit në lidhje me emërimet e larta në ushtri duke promovuar në mënyrë selektive oficerë dhe duke i refuzuar emërimet e të tjerëve. Disa zyrtarë ushtarakë kanë paralajmëruar se ministri po mundohet që ta politizojë ushtrinë duke i marrë nën kontroll emërimet e larta.
