Shefi i Vetëvendosjes, Albin Kurti, po bën fushatë për zgjedhjet e jashtëzakonshme të dhjetorit me gjuhë polarizuese. Para bashkëpartiakëve të tij në mbledhjen e Këshillit të Përgjithshëm të partisë ku u nominua që të jetë kandidat për kryeministër ia gjeti një armik mërgatës – partitë që ishin në opozitë. Për përdorimin e diasporës si temë politike nga Kurti dhe partia e tij veçse u ngritën paralajmërimet.
Lëvizja Vetëvendosje dhe partitë aleate të saj e shtynë 28 dhjetorin si datë për mbajtjen e zgjedhjeve në takimin e liderëve partiakë me presidenten Vjosa Osmani, e cila e aprovoi.
Preferencën e partive të tjera për datën 21 dhjetor tashmë Kurti dhe Vetëvendosje po japin sinjale se e kanë kthyer në qendrën e diskursit të tyre elektoral.
Këto data u lidhën me prezencën e mërgatës në vend dhe ardhjes së tyre të zakonshme për festat e fundvitit.
Lëvizja Vetëvendosje është e bindur në mbështetjen e mërgatës dhe partitë tjera po i shfaq si “armik” të saj.
Në fjalën e tij në Këshillin e partisë, Kurti, duke akuzuar partitë tjera pse nuk ia votuan qeverinë e tij e të Glauk Konjufcës, pa dhënë ndonjë provë, tha se ato s’po duan që mërgata të votojë.
“Nuk e pranuan një qeveri Kurti 3, as Konjufca 1. Tani që refuzuan bashkëpunimin me ne dhe luftuan edhe themelimin e Kuvendit, beteja e tyre ka gjetur duket një armik të ri, që është mërgata jonë”.
Më pas ai përmendi takimin me Osmanin.
“Në takimin tonë për caktimin e datës, të gjithë njëzëri kundërshtuan datën 28 dhjetor. Së pari thonin 7 e 14 dhjetor. Kur e panë që kjo është e pamundur, insistonin tek 21 dhjetori. Pra, thjesht dëshironin që mërgata të mos votojë. Si mund të jesh i gëzuar që nuk po voton ai i cili e ka lënë vendlindjen jo nga qejfi por nga zori?”, shtroi këtë pyetje Kurti, të cilës vetë ia dha përgjigjen – sërish pa ndonjë provë”.
“Kush e lufton mërgatën është i humbur që në fillim sepse kjo betejë nuk do t’i dobësojë ata, përkundrazi i mobilizon dhe i forcon. Është e pakuptimtë që të kërkohet kontributi financiar i mërgatës, por t’u mohohet e drejta themelore e votës. Ky standard i dyfishtë nuk mund të pranohet. Mirë që e bënë të qartë se çfarë mendojnë ata. më 28 dhjetor, mërgata duhet të tregojë po aq qartë se çfarë mendon për këtë sjellje të tyre”.
Duke shfrytëzuar këtë, Kurti më pas iu bëri thirrje mërgatës që të votojnë për partinë e tij si “partnere e tyre”.
“Ky është realiteti, mërgata nuk mund të trajtohet si burim i mjeteve e jo si qytetarë me të drejta të plota. Dhe përgjigjja e tyre duhet të jetë po aq e qartë sa edhe padrejtësia e cila po iu bëhet. Te ne mund të gjeni partnerin për çdo hap të përbashkët”.
Për përdorimin e kësaj gjuhe dhe për përpjekjet për avantazh politik nga Lëvizja Vetëvendosje dhe lideri i saj paralajmëroi mbrëmë Eugen Cakolli nga KDI.
Ai thotë se “më shpesh javëve në vijim do të jemi dëshmitarë të një përpjekje për krijimin e një narrative se një pjesë e skenës politike qenka kundër diasporës dhe pjesëmarrjes së saj në procese zgjedhore”.
“Kjo po shtyhet sistematikisht, në mënyrë që një subjekt të paraqitet si i vetmi që po i mbron votuesit jashtë vendit dhe të gjithë të tjerët të shihen me dyshim. Tensioni rreth diasporës nuk është prodhuar nga të gjitha palët. Në praktikë, vetëm njëra anë po e trajton çështjen e diasporës si mjet për të ndërtuar avantazh politik. Asnjë subjekt tjetër nuk ka ushtruar retorikë kundër pjesëmarrjes së diasporës, ndërsa LVV-ja e ka ngritur këtë temë në një nivel “strategjik” për të krijuar vijë ndarëse pro dhe kundër diasporës”, tha Cakolli.
Në “luftën” e të gjithëve kundër tij dhe tash kundër mërgatës, Kurti futi edhe Listën Serbe.
“Të njëjtit të dashur qytetarë, pra PDK, LDK, AAK, Lista Serbe, kanë votuar kundër që të ia mundësojnë mërgatës të votojnë në hapësira shtesë”, tha Kurti dje pasi KQZ miratoi hapësira shtesë për votime edhe jashtë ambasadave e konsullatave.
Për këto qendra të reja, Cakolli tha se kanë probleme ligjore.
“Legjislacioni e përcakton që votimi fizik jashtë vendit mund të zhvillohet vetëm në përfaqësitë diplomatike të Republikës së Kosovës. E qendrat e reja të miratuara nuk janë zyrtarisht pjesë e misioneve diplomatike, të paktën jo në momentin e vendimmarrjes. Disa nga qendrat shtesë të votimit kanë edhe probleme tjera ligjore, siç është rasti me qendrën në Neë York, e cila praktikisht është hapësirë ku kryhen rite fetare islame; si dhe disa qendra të tjera që janë realisht restorante, ku shërbehet dhe konsumohet alkooli”, tha Cakolli.
Sidoqoftë, liderët e partive shqiptare i bënë thirrje mërgatës që të marrin pjesë në procesin zgjedhor dhe deklaruan se mirëpresin atë në Kosovë.
Kryetari i PDK-së, Bedri Hamza, iu bëri thirrje atyre që në datën e zgjedhjeve s’janë në vend të regjistrohen për të votuar.
“Zgjidhni vetë mënyrën e votimit, por ju mirëpresim të vini sa më shumë edhe në atdhe dhe ta ushtroni këtu të drejtën tuaj”, tha Hamza.
Ndërkaq, kreu i LDK-së, Lumir Abdixhiku, i bëri thirrje mërgatës që të bashkohen me qytetarët që jetojnë në vend për të sjellë ndryshimin dhe për t’i dhënë dënimin për kohën e humbur.
“Të dashur qytetarë të Republikës, në Kosovë e në Mërgatë pa dallim, sot, me shpalljen e datës së zgjedhjeve, nisi një faqe e re për vendin tonë. Një faqe që nuk shkruhet me mllef, as me frikë, por me një besim të thellë se Kosova mund të jetë më shumë sesa ajo që ka qenë këto vite; sidomos këtë vit. Sot, për herë të parë pas një kohe të gjatë, pritja ka një fund. Shpresa ka një adresë. Ndryshimi ka një mundësi të vërtetë. Ky ndryshim është në dorën tuaj në këtë fundvit të një viti shumë të rëndë; për një fillim të ri”, tha ai.
