Përfundimi i kontratës mes Kompanisë Regjionale për Menaxhimin e Mbeturinave “Uniteti” me Komunën e Mitrovicës po jep efektet e para negative në këtë qytet.
Shportat për mbeturina të vendosura në qendër të Mitrovicës janë mbushur plot-e-përplot me mbeturina, tregojnë pamjet që kanë ardhur të enjten në adresën e gazetës online Reporteri.net.
Pamjet që pretendohet se u shkrepen të enjten paradite, përveç disa shportave të mbeturinave që ndodhën në qendër të qytetit, që shihen të jenë të stërmbushura me mbeturina, pasqyrojnë edhe gjendjen se si qese të zeza bërlloku janë lenë përreth tyre, pa u pastruar.
Vetë kompania regjionale njoftoi para dy ditësh “se kontrata e punës për larjen dhe fshirjen e rrugëve, largimin e deponive ilegale, zbrazjen e shportave rrugore nëpër sheshe, shëtitore dhe deri te Liqeni Akumulues, e cila ishte në mes të KRM “Uniteti” dhe Komunës së Mitrovicës, ka përfunduar që nga muaji tetor 2025”.
Sipas tyre, kjo kontratë, pavarësisht insistimit të KRM “Uniteti”, nuk është vazhduar nga punëdhënësi, në këtë rast Komuna e Mitrovicës.
“Si pasojë e mosvazhdimit të kontratës, KRM “Uniteti” njofton qytetarët e Komunës së Mitrovicës se nga data 25.11.2025 nuk do t’i kryejë më këto shërbime”.
Nga Komuna e Mitrovicës, e cila udhëhiqet nga kryetari në largim Bedri Hamza, deri më tash nuk kanë reaguar e as dalë me ndonjë njoftim rreth gjendjes.
