Agjencia e Mbikëqyrjes Policore të Republikës së Shqipërisë ka njoftuar se sot kanë ndaluar zyrtarin policor shqiptar me iniciale J.U, pas i njëjti dyshohet për veprat penale “Marrëdhënie seksuale me dhunë me të rritura” dhe “Shpërdorim i detyrës”, parashikuar në nenet 102 dhe 248 të Kodit Penal.
Kjo ka ndodhur pas denoncimit të bërë me datën 17 nëntor nga shtetasja L.H.
Agjencia e Mbikëqyrjes Policore pasi është marrë me rastin, ka kosntatuar se zyrtari policor J.U kishte qenë në Kosovë dhe se është ndaluar sot sapo ka hyrë në territorin e Republikës së Shqipërisë.
“Në vijim të veprimeve hetimore në lidhje me ngjarjen e datës 17.11.2025, ku pas kallëzimit të shtetases L.H., e cila ka ngritur pretendimin se punonjësi i policisë nëpërmjet shantazhit dhe kërcënimit ka kryer marrëdhënie seksuale me dhunë, AMP ka dërguar materialet proceduriale shtesë edhe për shtetasen M.U., e dyshuar për veprën penale “Kanosja për të mos kallëzuar” parashikuar në nenin 311 të Kodit Penal dhe shtetasin A.K., i dyshuar për veprën penale “Përkrahja e autorit në krim” parashikuar në nenin 302 të Kodit Penal”, thuhet në njoftim.
“Pas hetimeve me metoda speciale hetimi, u konstatua se punonjësi i policisë gjatë kësaj kohe ishte larguar në Republikën e Kosovës dhe ditën e sotme u bë i mundur ndalimi i tij nga agjentët e AMP në momentin e hyrjes në territorin e Republikës së Shqipërisë”, njofton Agjencia.
