Një incident i rëndë ka ndodhur mbrëmë në fshatin Bivolak të Vushtrrisë, ku sipas burimeve të besueshme nga strukturat e afërta me hetimin, një person ka shtënë disa herë me armë zjarri në rrethana ende të paqarta, mëson ekskluzivisht Gazeta Sinjali.
Viktima A. D. 32 vjecar është paraqitur në stacionin policor dhe ka deklaruar se rreth orës 22:00, derisa po qëndronte te një shok i tij, ka ardhur i dyshuari F. S. (1987) dhe ka shtënë 3-4 herë me armë zjarri, në drejtim të panjohur. Sipas tij, nga frika është larguar menjëherë me veturë dhe nuk ka raportuar rastin në momentin e incidentit.
Një dëshmitar, i cili ka qenë në vendin e ngjarjes, ka konfirmuar se i dyshuari ka shtënë me armë për ta frikësuar viktimën, për shkak të një problemi të mëhershëm mes familjeve.
Me urdhër të Prokurorit, Policia ka kryer kontroll në shtëpinë e të dyshuarit, ku janë gjetur dhe sekuestruar 14 fishekë të kalibrit 9mm. I dyshuari nuk është hasur dhe aktualisht është në kërkim nga organet e rendit.
Rasti është iniciuar si “Mbajtje në pronësi, kontroll ose posedim i paautorizuar i armës” dhe “Përdorim i armës apo mjetit të rrezikshëm”. Hetimet janë duke vazhduar.
