Vlora Çitaku, sekretarja e përgjithshme e PDK-së, ka akuzuar Lëvizjen Vetëvendosje për bllokimin e çdo iniciative të institucioneve të Kosovës për zhvillim energjetik.
Në një postim në Facebook, Çitaku shkruan se nga Termocentrali “Kosova e Re” deri te projekti amerikan i gazpërçuesit, VV ka kundërshtuar dhe shpeshherë sabotuar këto projekte, duke e rënduar situatën për familjet dhe prodhuesit vendorë.
“Lëvizja VV prej ditës së parë si parti politike, në mënyrë aktive dhe shpeshherë edhe me dhunë, ka sabotuar çdo iniciativë të institucioneve të Republikës së Kosovës për të ndërtuar kapacitetet tona energjetike.
Nga Termocentrali Kosova e Re e deri tek projekti amerikan i gazpërçuesit, VV ka kundërshtuar dhe bllokuar çdo përpjekje për zhvillim.
Sot, pavarësia energjetike nuk është vetëm çështje ekonomike. Është çështje e sigurisë kombëtare.
Ata e bllokuan Kosovën, i rënduan familjet dhe prodhuesit vendorë me çmime të papërballueshme dhe pasuruan mafien energjetike”, shkroi Çitaku, raporton Klankosova.tv.
Ajo shkroi po ashtu se kjo ka favorizuar “mafian energjetike” dhe se figura si Nagipi e Martini janë vetëm “maja e ajsbergut”, ndaj një mendësie të tillë do i vie fundi më 28 dhjetor.
“Nagipi e Martini janë vetëm maja e ajsbergut, rrënjët duken shumë më të thella.
Më 28 Dhjetor kësaj mendësie i vjen fundi.
Ata po e shohin, prandaj janë në panik”, shkroi Çitaku.
