Më 23 nëntor të këtij viti ka vdekur një 75-vjeçare në Vushtrri. Djali i saj, Bardhyl Duklini, ka akuzuar mjekët e Spitalit “Sheikh Zayed” për vonesë në trajtimin e nënës së tij, që vdiq katër ditë pas trajtimit aty.
Gazetarja e Reporteri.net, Leonora Kolukaj, ka biseduar me Bardhylin, i cili ka rrëfyer në detaje që prej momentit kur u paraqitën në spital.
Ai thotë se nëna e tij nuk e mori trajtimin e duhur atë ditë dhe se u la të priste për 35 minuta.
“Nana i ka pas 75 vjet. Ajo e ka pas aritminë, një sëmundje që e rrit pulsin. Jemi trajtu gjithmonë professional, shpejtë por se çka ndodhi më 19.11 se di as vetë…E çuam aty, e këqyrën, ia ngjitën aparatet edhe i doli pulsi 130”, rrëfen ai.
Ai thotë se pulsi iu rrit asaj në 145 dhe se pastaj e kontaktoi një teknik aty.
“Kur i shkoi pulsi 145, shkova tek tekniku i ndërrimit, i tregova që pulsi 145 i shkojë, përnjëherë ka shku e ka marrë injeksionin dhe ia ka jap direkt….Mjekja Shatri, më kujtohet emri, vendosi me ia jep edhe një paracetamol infuzion. Nuk e kuptojshim pse. S’pe kuptojmë pse ia dha. Pas kësaj i ra tensioni…Pastaj erdhën mjeku dhe qajo mjekja, i morën dokumentet të rëntgenit, i këqyrën edhe e kanë pas një shikim të veçantë, e kanë kqyr njëri-tjetrin. Nanën na e liruan”, rrëfen Bardhyli.
Bardhyli tregon se nënës së tij i ndryshoi pamja atë natë pas terapisë që mori në spital.
“Diçka e veçantë kur e kemi çu atë natë në shtëpi, nanës i ndryshoi fytyra. ..Ka qenë e lodhtë. Unë po dyshoj që ai injeksioni direkt që e ka lodhë, por edhe ai paracetamoli që ke i panevojshëm, plus pritja”.
Ajo kishte vdekur pas katër ditësh, në hyrje të shtëpisë.
Spitali ka dalë me reagim lidhur me rastin, ku ka thënë se pacientja ishte liruar në gjendje të mirë shëndetësore pas trajtimit që kishte marrë.
“Pacientja H.D ka qenë me sëmundje kronike e cila ka marrë shërbime shëndetësore herë pas her në Kujdesin Parësor Shëndetësor dhe në Spitalin “Sheikh Zayed” në Vushtrri. E njëjta është lajmëruar për trajtim shëndetësor me datën 19.11.2025, ora 18:40, dhe është trajtuar nga e ana e mjekëve kujdestar të Spitalit sipas protokolleve klinike. Pas trajtimit adekuat dhe marrjes së terapisë pacientja është liruar në gjendje të mirë shëndetësore”, thuhet në njoftim.
Aty thuhet se pacientja ishte sjellur me datën 23.11.2025 në Spitalin “Sheikh Zayed” në Vushtrri pa shenja jete.
“Megjithatë Spitali “Sheikh Zayed” në Vushtrri e ka formuar komisionin mjekësor, për verifikimin e rastit dhe në bazë të raportit profesional do të veprohet më tutje. Spitali “Sheikh Zayed” mbetet i përkushtuar për punë profesionale dhe shërbime shëndetësore cilësore për të gjithë pacientët!”, thuhet në njoftim.
