Komisioni Qendror i Zgjedhjeve (KQZ), të martën refuzoi certifikimin e partisë së serbëve të Kosovës, Listës Serbe, e cila kontrollohet nga Beogradi, për pjesëmarrje në zgjedhjet e 28 dhjetorit.
Ndaj këtij vendimi kanë reaguar nga BE-ja, ShBA-ja e përfaqësitë diplomatike perëndimore në Kosovë, duke e kundërshtuar si veprim.
Pos tyre, ka reaguar edhe Avokati i Popullit, i cili u shpreh i shqetësuar lidhur me vendimin e KQZ-së.
IAP thotë se ky vendim, i cili për herë të dytë refuzon kërkesën e këtij subjekti politik për certifikim, është marrë pa bazë të qëndrueshme juridike dhe në kundërshtim me procedurat e përcaktuara me ligj.
Avokati i Popullit rikujton se “përshtatshmëria politike vendoset nga qytetarët përmes votës së lirë dhe e jo përmes vendimeve administrative”.
IAP tha se shteti ka detyrimin pozitiv të sigurojë kushte të barabarta dhe procedura të drejta për të gjithë garuesit politikë, duke garantuar që çdo kufizim të jetë i domosdoshëm, proporcional dhe i mbështetur në ligj.
“Prandaj, çdo ndërhyrje e pajustifikuar që pengon pjesëmarrjen e një subjekti politik cenon këtë të drejtë dhe ndikon drejtpërdrejt në integritetin e procesit zgjedhor”, u tha në reagimin e Institucionit të Avokatit të Popullit.
Ky institucion thotë se ishte detyrim i KQZ-së të konstatonte faktet dhe të certifikonte subjektet që i plotësojnë kërkesat ligjore, duke garantuar sigurinë juridike dhe respektimin e procedurave në përputhje me legjislacionin vendor dhe standardet ndërkombëtare për të drejtat e njeriut.
Avokati i Popullit rikujtoi se, “sipas praktikave ndërkombëtare, masat që prekin ekzistencën ose pjesëmarrjen e një partie politike, përfshirë moscertifikimin, duhet të bazohen në një ligj të qartë, të qasshëm dhe të parashikueshëm, si dhe të respektojnë plotësisht procedurat e parashikuara me ligj”.
“Ndërhyrjet parandaluese janë të lejueshme vetëm kur bazohen në veprime konkrete të ndaluara me ligj dhe në vendime të formës së prerë të gjykatës, e jo në bazë të qëndrimeve politike”, tha IAP.
IAP kërkoi nga organet kompetente ta shqyrtojnë këtë vendim dhe të veprojnë në përputhje me parimin e ligjshmërisë, kushtetutshmërisë dhe vlerave të shoqërisë demokratike, “duke garantuar mbrojtjen efektive të së drejtës për të zgjedhur dhe për t’u zgjedhur”.
Lista Serbe ndërkaq sot njoftoi se ka dorëzuar ankesë në PZAP ndaj vendimit të KQZ-së.
Ishte Lëvizja Vetëvendosje ajo që votoi kundër certifikimit të Listës Serbe në KQZ, ndërsa partitë tjera abstenuan. /Klankosova.tv
