Gjermania të mërkurën u bë shteti i parë evropian që e dislokon sistemin e mbrojtjes ajrore “Arrow” për të penguar raketa balistike me rreze të mesme si ajo ruse “Oreshnik”, përderisa po synon që t’i kundërvihet atij që e sheh si kërcënim në rritje nga Moska.
Sistemi i zhvilluar nga kompania shtetërore izraelite, “Israel Aerospace Industries”, në bashkëpunim me Agjencinë e Mbrojtjes Raketore të Shteteve të Bashkuara, përdoret si shtresë e sipërme e mbrojtjes raketore të Izraelit, bashkë me Kupolën e Hekurt, e cila i eliminon raketat me rreze të shkurtër, raporton agjencia e lajmeve “Reuters”.
“Kush do të mund të imagjinonte se vetëm 80 vjet pas çlirimit të Aushvicit, shteti hebraik, përmes teknologjive që i zhvillon, do ta ndihmonte mbrojtjen jo vetëm të Gjermanisë, por të tërë Evropës: – tha Ron Prosor, ambasador i Izraelit në Berlin.
Disa shtete kanë shprehur interesim për ta blerë këtë sistem që nga koha kur ai u përdor për ta mbrojtur Izraelin nga sulmet e Iranit me raketa në prill dhe në tetor të vitit të kaluar, sipas kompanisë “Israel Aerospace Industries”.
Duke vepruar në lartësi mbi 100 kilometra, jashtë atmosferës së Tokës, dhe me rreze veprimi deri në 2.400 kilometra, sistemi e mbështet mbrojtjen nga raketat me rreze më të shkurtër si “Patriot” dhe IRIS-T, të cilat montohen në kamionë.
Ministri i Mbrojtjes i Gjermanisë, Boris Pistorius, e theksoi vlerën e këtij sistemi për paralajmërim të hershëm dhe mbrojtje të popullsisë e infrastrukturës.
“Me këtë kapacitet strategjik, i cili është unik në mesin e partnerëve tanë evropianë, ne po e sigurojmë rolin tonë kyç në zemër të Evropës” – tha ai.
