Kryetari i Komunës së Drenasit, Ramiz Lladrovci, i është kundërpërgjigjur kryetarit të Komunës së Skenderajt, Sami Lushtaku.
Ai ka bërë me dije se do ta angazhohet maksimalisht për të rritur votën për Bedri Hamzen në zgjedhjet e 28 dhjetorit.
I pari i Drenasit është shprehur optimist se do të rris numrin e deputetëve të PDK-së nga Drenasi.“Sa i takon lakimit të emrit tim nga Samiu, nga rinia ime e hershme nuk kam marrë leje e as që marr leje për çështje që i shoh me rëndësi për qytetarët e Drenasit dhe për vendin. Situata me parafushatën ka mundur të jetë më mirë për PDK-në nëse do të pyetej Samiu, për shembull lidhur me kthimin e Fatmirit në parti. Do të ishte më mirë por, po shihet se ai s’ka ndikim. Besoj fort se sërish do të jemi ndër komunat me më së shumti vota për Bedri Hamzën, po ashtu, pres të marrim vota më shumë se Skenderaj dhe të rritet numri i deputetëve nga Drenasi”, ka thënë Lladrovci, raporton Express.
