Një kontroll rutinë i Njësisë NJRSH në rrugën “Stefanova”, Qagllavicë, më 03 dhjetor 2025 rreth orës 20:00, ka zbuluar një sasi të madhe parash të transportuara në mënyrë të dyshimtë, mëson ekskluzivisht Gazeta Sinjali.
Burime të besueshme nga strukturat e afërta me hetimin bëjnë të ditur se policia ka ndaluar një veturë të tipit Porsche Cayenne, të drejtuar nga H.A, rreth 54-vjeçar, ndërsa pasagjer ishte M. K., rreth 40-vjeçar.
Gjatë kontrollit, brenda automjetit është gjetur një qese letre me para të gatshme. Hetuesit dhe forenzika e Stacionit Policor Graçanicë kanë dalë në vendngjarje dhe kanë njoftuar Prokurorin Kujdestar.
Të dy personat janë shoqëruar në stacion për intervistim në cilësi të të dyshuarve. Siç mëson Sinjali, M. K ka deklaruar se paratë i përkasin një familjari të tij që posedon një këmbimore dhe se ai ishte vetëm duke i transportuar.
Ndërkohë, H. A. ka mohuar të ketë pasur njohuri për shumën e gjetur, duke thënë se përgjegjësia i takon shoqëruesit të tij.
Paratë janë numëruar në prezencë të të dyshuarit M.K. dhe avokatit të tij, duke rezultuar në shumën prej 138,850 euro. Me urdhër të Prokurorit Kujdestar, kjo shumë është sekuestruar, ndërsa të dy personat janë liruar në procedurë të rregullt.
Hetimet për dyshimet e shmangies nga tatimi dhe origjinën e të hollave po vazhdojnë.
