Departamenti Special i Gjykatës Themelore në Prishtinë ka marrë vendim se ekzaminimi i telefonave pa urdhër të gjykatës shkel të drejtën kushtetuese për privatësi. Vendimi shënon një kthesë vendimtare në mbrojtjen e të drejtës kushtetuese dhe vendos një standard të ri për mbrojtjen e të dhënave personale të qytetarëve.
Avokati Faton Fetahu, i cili njoftoj për një rast ku po e përfaqësonte një klient të tij, ka thënë se ky vendim ky vendim ndalon praktikën e gabuar dhe të dëmshme të prokurorëve që për më shumë se dy dekada urdhëronin hapjen e telefonave pa leje gjyqësore, në kundërshtim me nenin 36 (3) të Kushtetutës.
“Një normë e shkruar qartë në Kushtetutë, nga sot (fatkeqësisht vetëm pas 17 vitesh nga miratimi i saj) merr jetë në kuptimin mbi thelbin e saj. E Drejta e Privatësisë, duke qenë njëra prej të drejtave themelore të njeriut, është e pacenueshme dhe mund të kufizohet përkohësisht, dhe atë vetëm me vendim gjyqësor.”, ka shkruar Fetahu.
Ai theksoi se vendimi është edhe fitore për qytetarët, duke vendosur një precedent që ndalon përdorimin e provave të marra në mënyrë të kundërligjshme dhe nxit korrigjimin e padrejtësive të mëparshme, përfshirë rastin e klientit të tij, i cili qëndroi mbi dy vite në paraburgim mbi bazën e provave që tani u shpallën të paligjshme.
“Ky vendim prek secilin prej nesh, sepse nga sot telefoni i çdo qytetari është i mbrojtur nga ndërhyrjet arbitrare. Siguria juridike rritet, shteti i së drejtës forcohet dhe qytetarët marrin garanci reale se privatësia e tyre nuk mund të shkelet sipas dëshirës së një prokurori, i cili në mënyrë kundërkushtetuese jo vetëm ka shkelur të drejtën e privatësisë së personit që ka hetuar, duke i zbuluar të dhëna dhe prova të papranueshme, duke ndërtuar aktakuza mbi bazën e tyre, por mbi të gjitha, ka ushtruar një kompetencë të gjykatës – një tagër që Kushtetuta ia ka njohur vetëm gjykatës dhe jo institucionit të prokurorit.,”, ka shkruar ai në Facebook.
Sipas tij, Gjykata në përbërje të kryetarit Lutfi Shala dhe anëtarëve Vesel Ismaili dhe Rrahman Beqiri ka theksuar se fshehtësia e komunikimeve, mesazheve dhe të dhënave personale është e pacenueshme dhe mund të kufizohet vetëm me vendim gjyqësor, në përputhje me proporcionalitetin e qëllimit të hetimit.
