Presidenca e Kosovës ka reaguar ashpër ndaj qarkullimit të një fotografie të manipuluar në rrjetet sociale, ku Presidentja Vjosa Osmani shihet së bashku me kryeparlamentaren serbe, Ana Bërnabiq, dhe ministrin e Jashtëm serb, Marko Gjuriq.
Në një sqarim për publikun, Presidenca ka bërë të ditur se pamja është tërësisht e montuar dhe ka për qëllim dëmtimin e imazhit të presidentes. Sipas reagimit, kjo nuk është një rastësi, por pjesë e një “fushate të mirë-organizuar” për të baltosur kreun e shtetit.
“Përdorimi i materialeve të rreme për ta goditur Presidenten është jo vetëm i ulët, por edhe i rrezikshëm. Këto tentime për përhapje të dezinformatave nuk janë të rastësishme dhe janë pjesë e një fushate të mirë-organizuar që synon të baltosë Presidenten e Republikës. Presidentja Osmani ka qenë dhe mbetet një zë i fuqishëm i shtetësisë, sovranitetit dhe dinjitetit të Kosovës dhe asnjë foto e rreme nuk mund ta zbehë këtë”, thuhet në reagimin e Presidences.
