Kancelari i Gjermanisë, Friedrich Merz, të martën doli kundër një sulmi verbal ndaj demokracie evropiane nga administrata e presidentit amerikan, Donald Trump, e cila javën e kaluar lëshoi një dokument strategjie ku deklarohej se kontinenti ballafaqohet me “shuarje të civilizimit”.
Strategjia e Sigurisë Kombëtare e ShBA-së, e publikuar javën e kaluar, shkaktoi shok në mbarë Evropën, me një akuzë ndaj qeverive evropiane për “përmbysje të proceseve demokratike” dhe ku thuhet se politika amerikane duhet ta përfshijë “kultivimin e rezistencës” brenda Bashkimit Evropian, raporton agjencia e lajmeve “Reuters”.
Gjuha e dokumentit ishte e ngjashme me kritikat e mëhershme ndaj Evropës nga figura udhëheqëse në administratën amerikane, përfshirë nënpresidentin J.D. Vance, dhe i vuri në pah tensionet në rritje mes Uashingtonit e kryeqyteteve evropiane.
“Një pjesë e saj është e kuptueshme dhe një pjesë është e papranueshme për ne nga një perspektivë evropiane” – tha Merzi para gazetarëve gjatë një vizite në Rheinland-Pfalz të Gjermanisë.
“Unë nuk e shoh nevojën që amerikanët tani të duan ta shpëtojnë demokracinë në Evropë. Nëse do të ishte e nevojshme që ta shpëtonim atë, do t’ia dilnim mbanë vetë” – shtoi ai.
“Pyetja se çfarë do të thotë kjo për bashkëpunimin tonë në siguri është qartazi pyetja më e rëndësishme. Ajo e vërteton vlerësimin tim se ne në Evropë, dhe prandaj gjithashtu në Gjermani, duhet të bëhemi shumë më të pavarur nga ShBA-ja në aspektin e politikës së sigurisë” – tha më tej kancelari gjerman.
Merzi tha se Trumpi, gjyshi i të cilit kishte shkuar në ShBA nga Gjermania, pritej që ta vizitonte fuqinë evropiane vitin e ardhshëm. “Ftesa është aty, natyrisht” – tha ai.
