Kandidati për deputet nga Lidhja Demokratike e Kosovës (LDK), Besim Mulaj, me numrin 79, ka prezantuar pesë angazhimet e tij kryesore nëse fiton besimin e qytetarëve për t’i përfaqësuar në Kuvendin e Kosovës.
Mulaj tha se politika duhet t’u shërbejë qytetarëve dhe interesit publik, e jo interesave të ngushta apo pazareve politike.
Si angazhim të parë, ai premton të jetë zëri i qytetarëve në Kuvend, duke siguruar që çdo shqetësim i tyre të ketë adresim të drejtpërdrejtë dhe kërkim të zgjidhjeve reale.
Angazhimi i dytë lidhet me votimin vetëm në interes të Kosovës, ku Mulaj shprehet se do të mbështesë ligje dhe vendime vetëm atëherë kur ato janë në dobi të shtetit dhe qytetarëve, duke refuzuar çdo ndikim nga interesa të ngushta.
Në pikën e tretë, kandidati i LDK-së thekson rëndësinë e ligjeve që nxisin investimet.
“Angazhohem për ndryshime ligjore që krijojnë një ambient më të mirë ekonomik dhe që e bëjnë Kosovën vend tërheqës për investime dhe vende të reja pune”, tha ai.
Mulaj po ashtu paralajmëron luftë të pandalshme kundër monopoleve.
“Do të jem i palëkundur në betejën kundër monopoleve që dëmtojnë konkurrencën e lirë dhe rëndojnë jetën e qytetarëve”, ka premtuar ai.
Si angazhimin e pestë, ai veçon zhvillimin e infrastrukturës, duke premtuar lobim të vazhdueshëm për përfundimin e projekteve të rëndësishme rrugore, me prioritet rrugët Pejë–Rugovë, Klinë–Istog dhe rruga Kalliqan në Bjeshkë, të cilat i cilëson si projekte me ndikim të drejtpërdrejtë në zhvillimin rajonal dhe perspektivën ekonomike.
