Lulzim Aliu është emëruar edhe për një mandat si nënkryetar i komunës së Ferizajit, dhe njëkohësisht është kandidat për deputet nga PDK në zgjedhjet e 28 dhjetorit, raporton Gazeta Online Veriu.info.
Aliu mban numrin 45 në listën e PDK-së.
Ai përmes një shkrimi ka thënë se vendimi për kandidim buron nga bondja e thellë se vendi ka nevojë për ndryshim.
“Paçim faqen e bardhë dhe na priftë e mbara!
130 është numri i listës fituese
45 është numri im në këtë listë
PDK është krenaria e Republikës sonë.” – shkruan Aliu.
Postimi i plotë:
Të nderuar familjarë, miq dhe qytetarë të Ferizajt!
Duke falenderuar Kryetarin Agim Aliu për besimin dhe përkrahjen e tij të vazhdueshme që më ka dhënë, duke më emëruar në pozitën e Nënkryetarit të Ferizajt edhe për një mandat tjetër, dua të ju njoftoj se njëkohësisht kam pranuar të jem pjesë e listës fituese të Partisë Demokratike të Kosovës në zgjedhjet nacionale të 28 dhjetorit.
Vendimi im për të kandiduar buron nga bindja ime e thellë se vendi ynë ka nevojë për ndryshim të domosdoshëm dhe për largimin e atyre që keqqeverisjen e kanë shndërruar në standard, duke cenuar institucionet që i kemi ndërtuar me vite pune e sakrifice.
Jam i bindur se, së bashku me Partinë Demokratike të Kosovës dhe Bedri Hamzën si kandidat për Kryeministër, do të arrijmë ta rikthejmë Kosovën në rrugën e saj të natyrshme drejt Perëndimit dhe NATO-s, duke garantuar zhvillim, mirëqenie dhe dinjitet për të gjithë qytetarët.
Paçim faqen e bardhë dhe na priftë e mbara!
130 është numri i listës fituese
45 është numri im në këtë listë
PDK është krenaria e Republikës sonë.
