Presidenti i Shteteve të Bashkuara, Donald Trump, ka thënë se vendi i tij do ta mbajë ose do ta shesë naftën e papërpunuar që ndodhet në anijet transportuese që i ka sekuestruar afër bregdetit të Venezuelës, si dhe vetë anijet.
Komentet e presidentit amerikan vijnë në kohën kur Uashingtoni po vazhdon që t’i bëjë trysni presidentit venezuelas, Nicolas Maduro, që të largohet nga pushteti, raporton televizioni BBC.
Duke folur para gazetarëve në Florida të hënën, Trumpi për naftën tha se “do ta mbajmë”, duke shtuar: “Ndoshta do ta shesim, ndoshta do ta mbajmë. Ndoshta do ta përdorim në Rezervat Strategjike. Do t’i mbajmë edhe anijet.”
Administrata e Trumpit e ka akuzuar Venezuelën se po i shfrytëzon të hyrat nga nafta për ta financuar krimin e lidhur me drogën, ndërsa Karakasi e ka cilësuar “piratëri” sekuestrimin e anijeve me naftë.
Ushtria amerikane ka sekuestruar dy anije transportuese të naftës këtë muaj, përfshirë një të shtunën.
Trumpi e lëshoi paralajmërimin e tij më të ri në kohën kur Roja Bregdetare e ShBA-së vazhdoi që të ndiqte një anije të tretë të naftës, të cilën autoritetet e përshkruan si pjesë të “flotës në hije” të Venezuelës që gjoja përdoret për t’i shmangur sanksionet amerikane.
“Ajo është duke lëvizur dhe ne do të përfundojmë duke e marrë atë” – paralajmëroi presidenti amerikan.
Në një zhvillim tjetër të hënën, ushtria amerikane tha se kreu një sulm ndaj asaj që e përshkroi si barkë e dyshimtë e trafikimit në ujëra ndërkombëtare në lindje të Oqeanit Paqësor. Komanda Jugore e ShBA-së tha se një person u vra.
