Policia e Kosovës, përmes Sektorit të Hetimeve të Departamentit për Kufi, në bashkëpunim dhe asistencë me Agjencinë e Kosovës për Inteligjencë (AKI), ka arrestuar sot një shtetas jordanez dhe një shtetase turke, nën dyshimin për kryerje të veprës penale “Kontrabandim me migrantë”.
Sipas Policisë, personat e arrestuar dyshohen se kanë organizuar ardhjen e shtetasve të huaj, kryesisht nga shtetet e Lindjes së Mesme dhe Azisë, me qëllim hyrjen në Republikën e Kosovës, nga ku më pas dyshohet se bëhej kontrabandimi i tyre drejt vendeve të Bashkimit Evropian.
Po ashtu, ndaj shtetasit jordanez ekziston dyshimi se ka udhëhequr një grup të mirëorganizuar kriminal, i cili dyshohet se ka përfituar mjete të konsiderueshme financiare nga kjo veprimtari e paligjshme.
Gjatë kontrollit të kryer nga Policia, janë gjetur dhe konfiskuar gjithsej 53 pasaporta të shtetasve jordanezë.
Për veprimet e ndërmarra është konsultuar edhe prokuroria kompetente, e cila ka vendosur që dy të dyshuarit të dërgohen në ndalim për 48 orë, për nevoja të hetimeve të mëtejshme.
Policia e Kosovës apelon tek qytetarët për të raportuar çdo veprimtari të dyshimtë që lidhet me trafikun e migrantëve, duke theksuar se institucionet ligjzbatuese do të vazhdojnë të ndërmarrin veprime për parandalimin dhe goditjen e këtij fenomeni kriminal.
