Bazuar në të dhënat zyrtare të Policisë së Kosovës, të nxjerra nga Sistemi i Menaxhimit të Integruar dhe raportimet e pranuara nga rajonet përkatëse, për një javë janë regjistruar gjithsej 374 mijë e 864 hyrje të qytetarëve në Republikën e Kosovës përmes pikëkalimeve kufitare tokësore dhe ajrore.
Me ardhjen e diasporës në Kosovë, është rritur edhe fluksi i hyrjeve, me intensitet më të madh në ditët e fundit të javës.
Nga Policia e Kosovës në një përgjigjje për Gazetën Online Reporteri.net kanë thënë se kulmi i hyrjeve është shënuar gjatë vikendit, ditët – premte, shtunë, diel – ku në Kosovë kanë hyrë 213 mijë e 751 qytetarë.
Më 15 dhe 16 dhjetor 2025 janë regjistruar 74 mijë e 560 qytetarë që kanë hyrë në Kosovë, duke vazhduar me një rritje progresive nga dita në ditë.
Më 17 dhjetor kanë hyrë 39 mijë e 920, ndërsa më 18 dhjetor janë evidentuar mbi 46 mijë e 633 hyrje.
Krahas festave të fundvitit, Kosova mban zgjedhjet nacionale më 28 dhjetor, gjë që ka shtuar edhe më shumë numrin e qytetarëve nga diaspora të ardhur në Kosovë. Se ka numër të madh e tregonin edhe pritjet e gjata në pikat kufitare në hyrje të Kosovës, ku Qendra Kombëtare për Menaxhim Kufitar raportonte gjatë kësaj jave për kolona të gjata e pritje disa-orëshe.
Sipas të njëjtave të dhëna zyrtare të Policisë së Kosovës për Gazetën Online Reporteri.net, gjatë periudhës 15–21 dhjetor 2025 janë regjistruar gjithsej 254,661 dalje të qytetarëve nga Republika e Kosovës përmes pikëkalimeve kufitare tokësore dhe ajrore.
Të dhënat tregojnë se numri i daljeve ka qenë më i ulët krahasuar me hyrjet në periudhën e njëjtë.
Më 15 dhe 16 dhjetor 2025 janë evidentuar gjithsej 64 mijë e 402 qytetarë në dalje, ndërsa më 17 dhe 18 dhjetor janë regjistruar përkatësisht 34 mijë e 391 dhe 34 mijë e 721 qytetarë në dalje.
Fluksi më i lartë i daljeve është shënuar më 21 dhjetor 2025, kur nga Kosova kanë dalë 44 mijë e 629 qytetarë, ndërsa një ditë më herët, më 20 dhjetor, janë regjistruar në dalje 37 mijë e 124 qytetarë.
