Në orët e para të mëngjesit të djeshëm, presidenti i Shteteve të Bashkuara të Amerikës, Donald Trump njoftoi se presidenti i Venezuelës Nicolas Maduro dhe bashkëshortja e tij Cilia Flores ishin “kapur dhe nxjerrë jashtë vendit”.
CNN përmblodhi se çfarë dihet për atë që i ka ndodhur që atëherë:
Maduro dhe Cilia Flores u tërhoqën zvarrë nga dhoma e gjumit në mes të natës, sipas dy burimeve të njohura me çështjen. Operacioni amerikan u krye ndërsa ata po flinin, thanë burimet.
Disa orë më vonë, Trump publikoi një fotografi të Maduros në bordin e anijes luftarake USS Iwo Jima, i veshur me një kostum sportiv gri Nike dhe duke mbajtur në dorë një shishe uji. Ai mbante gjithashtu një maskë të zezë për sytë dhe kufje.
Maduro u pa më pas duke zbritur nga një avion në bazën Stewart Air National Guard në New York, ku u shoqërua nga më shumë se një duzinë agjentësh federalë të veshur me të zeza, sipas pamjeve nga filiali i CNN-it, WCBS.
Më pas ai u transportua drejt Manhattanit me helikopter dhe më tej drejt Qendrës Metropolitane të Paraburgimit në Brooklyn, gjithashtu me helikopter. Ai po mbahet atje aktualisht.
Menjëherë pas kësaj, llogaria zyrtare e reagimit të shpejtë e Shtëpisë së Bardhë publikoi një video të asaj që dukej se ishte Maduro duke marrë pjesë në një “perp walk”. Në video, Maduro mban një bluzë sportive me kapuç dhe pantallona të zeza, duke u uruar të pranishmëve në dhomë “natë të mirë” dhe “Gëzuar Vitin e Ri” në anglisht.
