Ndërmarrja Trepça Sh.A. ka rikthyer pronat e saj në Komunën e Podujevës, duke krijuar kushte të sigurta ligjore dhe ekonomike për zhvillimin e projekteve strategjike minerare dhe investime afatgjata.
Sipas njoftimit të Trepçës, kthimi i pronave përbën një hap të rëndësishëm drejt zbatimit të projektit minerar “Çuka e Batllavës”, i cili mbështetet në prona të sigurta dhe rezerva minerare të verifikuara.
Bazuar në studimin e fizibilitetit Nr. P.36, të datës 13 janar 2023, projekti parasheh rezerva minerare prej rreth 11 milionë tonësh, me një prodhim të planifikuar prej rreth 350 mijë tonësh në vit. Të hyrat vjetore të projektit pritet të tejkalojnë 42 milionë dollarë amerikanë, ndërsa fitimi neto vjetor vlerësohet rreth 16 milionë dollarë.
Po ashtu, studimi tregon se kthimi i investimit pritet të realizohet brenda 15 muajve, ndërsa jetëgjatësia e projektit vlerësohet të jetë mbi 30 vjet.
Nga Trepça theksojnë se rikthimi i pronave dhe avancimi i projekteve strategjike dëshmon angazhimin e ndërmarrjes për zhvillim të qëndrueshëm dhe kthimin e vlerës ekonomike aty ku i takon.
