Një ditë pasi Trepça Sh.A. njoftoi për largimin nga puna të katër punëtorëve, me arsyetimin se nuk kanë respektuar orarin e punës, ka ardhur reagimi i Sindikatës së Trepçës, e cila e cilëson këtë veprim si pjesë të një përndjekjeje selektive dhe presioni të vazhdueshëm ndaj minatorëve, shkruan Mitropol.
Në reagimin e saj publik, Sindikata shpreh shqetësim të thellë për, siç thuhet, ndëshkimin e punëtorëve që kanë bindje dhe qëndrime ndryshe nga menaxhmenti i ndërmarrjes, në një kohë kur problemet reale të Trepçës, sipas tyre, po mbesin pa përgjegjësi dhe pa zgjidhje.
“Sot, pasojat e keqmenaxhimeve dhe keqpërdorimeve të evidentuara ndër vite po tentohen t’u barten minatorëve, të cilët po trajtohen si fajtorë për gabime që nuk i kanë shkaktuar”, thuhet në reagimin e Sindikatës.
Sipas saj, komisionet disiplinore në Trepçë po veprojnë në mënyrë selektive dhe të njëanshme, nën ndikim dhe direktiva të caktuara, e jo mbi bazën e ligjit, fakteve dhe rregulloreve në fuqi. Sindikata thekson se minatorëve po u mohohet e drejta për mbrojtje, për informim të drejtë dhe për trajtim të barabartë në raportet e punës.
Në reagim kritikohet edhe heshtja e institucioneve përgjegjëse, përfshirë Inspektoratin e Punës, Prokurorinë dhe gjykatat. Sipas Sindikatës, Inspektorati i Punës nuk po reagon ndaj shkeljeve të vazhdueshme në marrëdhëniet e punës, Prokuroria po vonon trajtimin e rasteve të dyshuara për keqpërdorime, ndërsa gjykatat po zvarrisin procedurat, duke e bërë drejtësinë të vonuar dhe praktikisht të mohuar për minatorin.
“Nëse minatori nuk mbrohet nga ligji dhe institucionet, kush e mbron atë?”, ngre pyetjen Sindikata, duke shtuar se po cenohet rëndë e drejta elementare për dinjitet në punë, për siguri, për trajtim njerëzor dhe për drejtësi.
Në reagim theksohet gjithashtu se është më e lehtë të ndërtohet karrierë personale duke mbyllur sytë para padrejtësive, sesa të merret përgjegjësi për t’i ndrequr ato. Megjithatë, Sindikata shpreh bindjen se drejtësia mund të vonojë, por nuk mund të shuhet, duke paralajmëruar se përgjegjësia, herët a vonë, do të kërkohet nga ligji, shoqëria dhe historia.
Sindikata u bën thirrje minatorëve që të ruajnë qetësinë, unitetin dhe dinjitetin e tyre, duke theksuar se nuk kërkojnë konflikt apo privilegje, por drejtësi, trajtim të barabartë dhe njerëzor. Ajo nënvizon se, pavarësisht kostos që, sipas tyre, po u faturohet padrejtësisht minatorëve, ata nuk do të nënshtrohen dhe nuk do t’ua ndryshojë askush bindjen.
Në fund, Sindikata njofton se është duke e ndjekur situatën me vëmendje të plotë dhe se së shpejti do të ndërmarrë hapa konkretë, në koordinim me minatorët, për të kërkuar zgjidhje dhe drejtësi. Po ashtu, ajo i bën sërish thirrje publike Prokurorisë Speciale të Republikës së Kosovës që të zhvillojë hetime serioze dhe të mos qëndrojë, siç thuhet, “duarkryq përball kësaj katrahure dhe përndjekjeje”.
