Komisioni Qendror i Zgjedhjeve (KQZ) ka publikuar raportin e paaudituar të deklarimit financiar të fushatës zgjedhore të Partisë Demokratike të Kosovës (PDK) për Zgjedhjet Lokale 2025, të mbajtura më 12 tetor.

Sipas raportit për periudhën 9 qershor – 9 nëntor 2025, PDK ka realizuar të hyra totale prej 248 mijë e 543 euro e 18 centë, ndërsa shpenzimet e fushatës kanë arritur në 272,772.06 euro, duke rezultuar me një deficit prej 24,228.88 euro, shkruan Gazeta Online Reporteri.net.

PDK ka deklaruar 25 mijë e 780 euro donacione dhe kontribute në të holla, si dhe 222 mijë e 763 eeuro e 18 centë kontribute në natyrë, në formë mallrash dhe shërbimesh. Të hyra nga buxheti i shtetit apo nga anëtarësia nuk janë raportuar për këtë periudhë.

Shpenzimet më të mëdha janë realizuar në kategorinë e shpenzimeve të përgjithshme, në vlerë prej 222,763.18 euro, të cilat përkojnë me kontributet në natyrë të deklaruara nga subjekti politik.

Ndërkohë, për reklama, reprezentacion dhe konferenca janë shpenzuar 50 mije e 8 euro e 88 euro centë kryesisht për reklamime në media dhe rrjete sociale. Nuk janë raportuar shpenzime për paga, transport apo blerje mallrash gjatë kësaj periudhe.

Në fund të periudhës raportuese, PDK ka pasur 248 mijë e 991 euro e 5 cento euro para dhe ekuivalentë të parasë, ndërsa detyrimet totale kapin vlerën 44,292.81 euro. Ekuiteti i subjektit politik në fund të periudhës është deklaruar 208 mijë e 234 euro e 75 centë.

Raporti financiar është nënshkruar nga përfaqësuesi i autorizuar financiar, Muhamet Morina, ndërsa kryetar i PDK-së në atë kohë ishte Memli Krasniqi.

KQZ ka bërë të ditur se raportet financiare të fushatës janë publikuar në përputhje me Ligjin për Financimin e Subjekteve Politike, me qëllim të rritjes së transparencës mbi shpenzimet dhe burimet e financimit të subjekteve politike gjatë fushatës zgjedhore.