Cilësia në arsim mbetet një nga temat më të diskutueshme të çdo qeverie të re, edhe kur ato ndërrohen problemet mbesin të njëjta.
Një nga problemet e kamotshme të sistemit arsimor në Kosovë, mbetet niveli i performancës së mësimdhënësve në shkollat fillore e të mesme.
Qeveria aktuale më në fund ka gjetur gjuhë të përbashkët për një temë me Sindikatën e Bashkuar të Arsimit Shkencës dhe Kulturës (ShBASHK), e ajo është mënyra se si do të bëhet vlerësimi i performancës së mësimdhënësve.
SBAShK-u dhe MAShTI-i janë pajtuar që të mos ketë testim të mësimdhënësve, por vetëm vlerësim të performancës së tyre.
Teksa, numri i vogël i inspektorëve dhe joefikasiteti i tyre për ta vlerësuar performancën e mësimdhënësve, ka bërë që të merret një vendim i ri që vlerësimin e mësimdhënësve ta bëjnë drejtorët apo zëvendësdrejtorët e shkollave përkatëse.
Duke e pasur parasysh se një pjesë e drejtorëve të shkollave janë përzgjedhur në mënyrë politike, ka bërë që disa mësimdhënës t’i ngritin dyshimet se sa do të jenë reale vlerësimet e tyre.
Këtë e ka konfirmuar për Portalin Dukagjini kryetari i SBAShK-ut, Rrahman Jasharaj, i cili ka thënë se me gjithë hezitimin e disa mësimdhënësve, vendimi për vlerësimin e mësimdhënësve nga drejtorët e shkollave ka qenë i duhur dhe se sindikata e arsimit është pajtuar me të.
Sipas tij, secili mësimdhënës që nuk pajtohet me vlerësimin e drejtorit të shkollës, që dyshon se ai vlerësim është bërë në shenjë hakmarrjeje apo në çfarëdo forme tjetër, mund të ankohet në Drejtorinë Komunale për Arsim, në komunën e tyre përkatëse, dhe pastaj vlerësimi do të mund të bëhet nga inspektorët profesionalë.
“Ka pasur hezitime dhe mëdyshje nga mësimdhënësit se drejtorët i kemi goxha politikë, a do të jetë vlerësim real për të gjithë, por unë konsideroj që edhe kjo çështje ka gjetur zgjidhje, secili mësimdhënës që dyshon se drejtori nuk e ka vlerësuar si duhet për shkak se ai apo ky nuk e përkrah ndonjë subjekt politik, mund të ankohen në DKA, pastaj pse jo edhe në MAShTI për t’u vlerësuar përsëri”, ka deklaruar Jasharaj.
Kryetari i SBAShK-ut është shprehur se vendimi ka qenë i pranueshëm për SBAShK-un, për shkak se sipas tij drejtorët e shkollave janë më afër mësimdhënësve sesa inspektorët. Ai ka bërë të ditur se Ministria e Arsimit është duke punuar që përmes vlerësimit të performancës të parashihet edhe gradimi i mësimdhënësve. Pastaj sipas tij në ligjin e pagave të përfshihet një shtesë në pagë për mësimdhënësit që marrin vlerësime të mira.
“Inspektorët profesionalë të lëndës do t’i vizitojnë nga afër dhe do të shohin se a kanë arritur ata njohuri të mjaftueshme për të marrë gradë të re dhe nëse marrin gradë të re, MAShTI-i është angazhuar dhe besoj se kështu do të ndodhë, që me ligjin e ri të pagave të vihet një shtesë në pagë për ata që gradohen”, ka thënë Jasharaj.
Egzon Gashi, themelues i organizatës arsimore “Teach For Kosova”, e ka përmendur një gabim që sipas tij është bërë gjatë 15 viteve të fundit nga Ministria e Arsimit, në lidhje me tentimin për vlerësimin apo zhvillimin e performancës së mësimdhënies në Kosovë.
Sipas tij, në Kosovë është tentuar që të zbatohen instrumente të shteteve të tjera, pa i përshtatur me kontekstin apo me nevojat që i ka Kosova, respektivisht sektori i arsimit.
Gashi, i cili ka studiuar në Shtetet e Bashkuara të Amerikës (ShBA), tregoi se është duke punuar për ta krijuar një instrument, i cili pastaj do të mund të përdorej nga drejtorët e shkollave për t’i vlerësuar performancat e mësimdhënësve.
Sipas tij, Kosova duhet të marrë shembuj nga vendet perëndimore apo ShBA-ja, por së pari duhet të përshtatet me kontekstin dhe rrethanat e arsimit që mbizotërojnë në vendin tonë.
“Po mendojmë bashkë me Universitetin ta krijojmë një instrument të ri i cili mund të përdoret prej drejtorëve apo kushdo që do ta bëjë vlerësimin e performancës, dhe të jetë i kontekstualizuar me nevojat e Kosovës dhe të përshtatet me sistemin tonë arsimor, d.m.th. është shumë e rëndësishme të kemi shembuj të ndryshëm të vendeve, por nëse nuk përshtatet me kontekstin e Kosovës, është shumë vështirë të ketë sukses”, ka deklaruar Gashi.
Ai është shprehur se vlerësimi i performancës së mësimdhënësve nuk mjafton të bëhet një herë në vit, por sipas tij, kjo duhet të bëhet pesë herë në vit, varësisht nga nevojat.
Sipas themeluesit të “Teach For Kosova”, është shqetësuese mënyra apo ndikimi politik në përzgjedhjen e drejtorëve të shkollave. Gashi ka theksuar se kjo është një nga të metat e arsimit në Kosovë. Sipas tij, drejtorët nuk duhet të jenë politikë, sepse pastaj “aty mund të hyjnë edhe interesa të tjera në arsim”.
Gashi ka theksuar nevojën e shtimit të llogaridhënies dhe përgjegjësisë së drejtorëve të shkollave, në këtë mënyrë sipas tij edhe vlerësimi i performancës për mësimdhënësit do të jetë më cilësor.
Ai ka thënë se në 10 vitet e fundit janë vlerësuar vetëm 700 mësimdhënës.
