Korporata Energjetike e Kosovës (KEK) ka parashtruar padi ndaj deputetes së zgjedhur të LDK-së, Janina Ymerit, siç ka theksuar, si pjesë e veprimeve ligjore për mbrojtjen e integritetit institucional.
Sipas njoftimit Ymeri “në mënyrë të vazhdueshme, ka shpërndarë informata të pasakta, propaganduese dhe të pavërtetuara lidhur me prodhimin e energjisë elektrike, duke krijuar konfuzion te opinioni publik dhe duke tentuar t’i atribuojë KEK-ut përgjegjësi që nuk i përkasin”.
Ndaj kësaj situate ka reaguar në rrjetet sociale, juristi Dardan Kadaj.
Ai ka reaguar ndaj, siç e quan, keqleximit të Ligjit kundër Shpifjes në lidhje me padinë e KEK-ut për shpifje, duke theksuar se kjo ndërmarrje publike nuk ndalohet ligjërisht të kërkojë dëmshpërblim.
“Mbi (keq)leximin e Ligjit kundër Shpifjes. Paragrafi 4 i nenit 5 të Ligjit kundër Shpifjes, na u prezantua si norma që ndalon KEK-un të kërkoj dëmshpërblim për shpifje. Deputetja në ardhje, tha që juristët e KEK-ut e kanë ditur ose do të duhej ta dinin që padia për shpifje ndaj saj nuk është e lejueshme, rrjedhimisht konstatoi që padia është bërë për tendencë frikësimi e përndjekjeje. Por, ndërkohë që neni 5.4 thotë që autoriteti publik nuk mund të kërkoj dëmshpërblim për shpifje, Autoritetin Publik e definon si person juridik që ushtron pushtetin publik. KEK-u është ndërmarrje publike, organizimi dhe udhëheqja e së cilës bëhet në përputhje me Ligjin për Shoqëritë Tregtare. KEK-i nuk ushtron pushtet publik – është korporatë që prodhon dhe shet rrymë. Për më tepër, KEK nuk përfaqëson monopol natyral. Pra, përtej paranojës e keqinformimit, juristët në KEK, në fakt kanë vepruar pikërisht sipas rolit që i takon zyrës ligjore të një korporate. Për hesap timin, veprimet si ky, janë praktikat që ndërmarrjet publike duhet të ndjekin për të qëndruar konkurruese në raport me sektorin privat. Ruajtja e kredibilitetit të ndërmarrjes është parakusht i suksesit të saj. Një eksperte e energjisë e din (ose do duhej ta dinte) kush në sektorin e energjisë ushtron pushtet publik. E një deputete nuk do duhej të sabotonte korporatën, pronar i se cilës është Republika e Kosovës”, ka shkruar Kadaj.
